കൊച്ചി: ഡോ. പല്പുവിന്റെ 161-ാമത് ജയന്തിസംഗമവും ദശാബ്ദി പുരസ്‌കാര സമർപ്പണവും ഇന്ന് വൈകിട്ട് നടക്കും. ചതയോപഹാരം ഗുരുദേവ ട്രസ്റ്റിന്റെ ആഭിമുഖ്യത്തിൽ വൈകിട്ട് മൂന്നിന് ആലുവ അദ്വൈതാശ്രമത്തിലാണ് പരിപാടി. എസ്.എൻ.ഡി.പി യോഗം പ്രസിഡന്റ് ഡോ.എം.എൻ. സോമൻ ഉദ്ഘാടനം ചെയ്യും. ട്രസ്റ്റ് ചെയർമാൻ പി.ഐ. തമ്പി അദ്ധ്യക്ഷനാകും. ദശാബ്ദി പുരസ്‌കാരം പ്രശസ്ത ഗുരുധർമ്മ പ്രചാരകൻ ചേന്ദമംഗലം എം.വി. പ്രതാപന് സമർപ്പിക്കും.

ഹൈക്കോടതി മുതിർന്ന അഭിഭാഷകയും ശ്രീനാരായണ സേവികാസമാജം ചെയർപേഴ്‌സണുമായ വി.പി. സീമന്തിനി ആമുഖപ്രഭാഷണം നടത്തും. അദ്വൈതാശ്രമം സെക്രട്ടറി സ്വാമി​ ധർമ്മചൈതന്യ അനുഗ്രഹപ്രഭാഷണം നടത്തും. ശ്രീനാരായണ സാംസ്‌കാരികസമിതി മദ്ധ്യമേഖലാ സെക്രട്ടറി എം.എൻ. മോഹനൻ ഡോ. പല്പു അനുസ്മരണവും കുന്നത്തുനാട് യൂണിയൻ മുൻ സെക്രട്ടറി എ.ബി. ജയപ്രകാശ് മുഖ്യപ്രഭാഷണവും നടത്തും.

സ്‌പെഷ്യലിസ്റ്റ് ആശുപത്രി ഡയറക്ടർ ഡോ.കെ.ആർ. രാജപ്പൻ വിശിഷ്ടാതിഥിയാകും. എസ്.എൻ.ഡി.പി യോഗം അസിസ്റ്റന്റ് സെക്രട്ടറിയും ആലുവ ശ്രീനാരായണ ക്ലബ് പ്രസിഡന്റുമായ കെ.എസ്. സ്വാമിനാഥൻ മുഖ്യാതിഥിയാകും. ആലുവ യൂണിയൻ പ്രസിഡന്റ് സന്തോഷ്ബാബു, കുന്നത്തുനാട് യൂണിയൻ ചെയർമാൻ കെ.കെ. കർണൻ, പറവൂർ യൂണിയൻ പ്രസിഡന്റ് സി.എൻ. രാധാകൃഷ്ണൻ, വൈപ്പിൻ യൂണിയൻ പ്രസിഡന്റ് ടി.ജി. വിജയൻ എന്നിവർ സംസാരിക്കും.