മൂവാറ്റുപുഴ: മൂവാറ്റുപുഴ നഗരസഭ 12-ാം വാർഡിലെ വനിത കൗൺസിലർ ലൈല ഹനീഫയെ അസഭ്യം പറയുകയും സ്ത്രീത്വത്തെ അപമാനിക്കുകയും ചെയ്ത ആരോഗ്യകാര്യ സ്ഥിരം സമിതി അദ്ധ്യക്ഷൻ പി.എം. അബ്ദുൽ സലാം രാജിവയ്ക്കണമെന്ന് ആവശ്യപ്പെട്ട് എൽ.ഡി.എഫിന്റെ നേതൃത്വത്തിൽ ഇന്ന് രാവിലെ 10ന് നഗരസഭ ഓഫീസിലേയ്ക്ക് ബഹുജന മാർച്ചും ധർണയും നടത്തും. ലൈല ഹനീഫ നഗരസഭ സെക്രട്ടറിയ്ക്ക് നൽകിയ പരാതി പൊലീസിന് കൈമാറാൻ നഗരസഭ സെക്രട്ടറിയും ചെയർമാനും ആദ്യഘട്ടത്തിൽ തയ്യാറായില്ല. ലൈല പൊലീസിൽ കൊടുത്ത പരാതിയിൽ എന്തെങ്കിലും നടപടിയെടുത്തായി അറിയില്ല. അബ്ദുൾ സലാമിനെതിരെ സംരക്ഷിയ്ക്കുന്ന നിലപാടാണ് യു.ഡി.എഫിന്റേത്. സ്വന്തം പാർട്ടിയിൽപ്പെട്ട വനിത ജനപ്രതിനിധിയെ അപമാനിച്ച ലീഗ് നേതാവ് അബ്ദുൾ സലാമിനെതിരെ നടപടിയെടുക്കാൻ മുസ്ലീം ലീഗ് നേതൃത്വവും തയ്യാറാകുന്നില്ല. നടപടിയെടുക്കും വരെ ശക്തമായ സമരം തുടരുമെന്ന് എൽ.ഡി.എഫ് കൺവീനർ എൻ. അരുൺ അറിയിച്ചു.

,