മൂവാറ്റുപുഴ: സ്ത്രീത്വത്തെ അപമാനിക്കുന്ന നിലയിൽ വനിത കൗൺസിലറെ അധിക്ഷേപിച്ച ആരോഗ്യകാര്യ സ്ഥിരം സമിതി അദ്ധ്യക്ഷൻ പി.എം. അബ്ദുൽ സലാം രാജി വയ്ക്കണമെന്ന് ആവശ്യപ്പെട്ട് മൂവാറ്റുപുഴ നഗരസഭ ഓഫീസിലേയ്ക്ക് എൽ.ഡി.എഫിന്റെ നേതൃത്വത്തിൽ ബഹുജന മാർച്ചും ധർണയും നടത്തി. എസ്തോസ് ഭവന് മുന്നിൽ നിന്ന് തുടങ്ങിയ മാർച്ച് നഗരസഭ ഓഫീസിന് മുന്നിൽ സമാപിച്ചു. തുടർന്ന് നടന്ന ധർണ സി.പി. എം ജില്ലാ കമ്മിറ്റി അംഗം അഡ്വ. പി.എം ഇസ്മയിൽ ഉദ്ഘാടനം ചെയ്തു. സി.പി.ഐ മണ്ഡലം സെക്രട്ടറി ജോളി പൊട്ടയ്ക്കൽ അദ്ധ്യക്ഷത വഹിച്ചു. സി.പി. എം ഏരിയ സെക്രട്ടറി കെ.പി. രാമചന്ദ്രൻ, സി.പി.ഐ ജില്ല എക്സിക്യൂട്ടിവ് അംഗം കെ.എ .നവാസ്, സി.പി.എം ഏരിയ കമ്മിറ്റി അംഗം എം.എ. സഹീർ, ഡി.വൈ.എഫ്.ഐ ജില്ലാ പ്രസിഡന്റ് അഡ്വ. അനീഷ് എം. മാത്യു തുടങ്ങിയവർ സംസാരിച്ചു. തന്നെ അപമാനിച്ച അബ്ദുൾ സലാമിനെതിരെ നടപടി സ്വീകരിക്കണമെന്ന് ആവശ്യപ്പെട്ട് പരാതി നൽകിയ വനിത കൗൺസിലർ ലൈല ഹനീഫ നഗരസഭയ്ക്ക് മുന്നിൽ മൂന്നാം ദിവസവും സമരം തുടർന്നു.