കൊച്ചി: 'ട്റിപ്പിളടിക്കും മാഷേ ...' മഹാരാജാസിലെ ട്രാക്കിലിറങ്ങും മുമ്പ് പരിശീലകൻ നവാസിന് കൊടുത്തവാക്ക് നാലാംദിനം പാലിച്ച എം.അമൃതിന്റെ മുഖത്ത് നിറചിരി. ഹൃദത്തോട് ചേർത്ത് നിറുത്തി നാവാസിന്റെ സ്‌നേഹം. ജൂനിയർ ആൺകുട്ടികളുടെ 1500 മീ​റ്ററിൽ ഒന്നാമത് ഫിനിഷ് ചെയ്താണ് കല്ലടി എച്ച്.എസ്.എസ് കുമരംപുത്തുരിലെ അമൃത് ഇത്തവണത്തെ ആദ്യ ട്രിപ്പിൾ സ്വർണ നേട്ടം സ്വന്തമാക്കുന്ന താരമായത്.

കഴിഞ്ഞ ദിവസങ്ങളിൽ നടന്ന 400 , 800 മീ​റ്ററുകളിൽ അമൃത് സ്വർണം നേടിയിരുന്നു.

14.14 സെക്കൻഡിൽ ഫിനിഷ് ചെയ്താണ് അമൃത് മൂന്നാം സ്വർണം ഓടിയെടുത്തത്. കഴിഞ്ഞ കായികമേളയിൽ 1500, 800 മീ​റ്റർ മത്സരങ്ങളിൽ സ്വർണം നേടിയിരുന്നു. പഴതറ കുളത്തുങ്കൽ വീട്ടിൽ മോഹനൻ - പുഷ്പ ദമ്പദികളുടെ മകനാണ്. സഹോദരൻ അമൽ സീനിയർ 400 മീ​റ്റർ ഹർഡിൽസിൽ മത്സരിക്കുന്നുണ്ട്. നാലു വർഷമായി സായി കോച്ചായ നവാസിന് കീഴിലാണ് പരിശീലനം.