വൈപ്പിൻ: മുനമ്പം കടപ്പുറം നിവാസികളുടെ ഭൂമി സംരക്ഷണ നിരാഹാര സമരത്തിന് പിന്തുണയുമായി ക്രിസ്ത്യൻ സർവീസ് സൊസൈറ്റി ഐക്യദാർഢ്യ റാലി നടത്തി. മുനമ്പം പുലിമുട്ടിന് സമീപത്തുനിന്ന് ആരംഭിച്ച റാലി വേളാങ്കണ്ണിമാത പള്ളിയങ്കണത്തിലെ സമര പന്തലിൽ എത്തി നിരാഹാരസമരത്തിന് പിന്തുണയും ഐഖ്യദാർഢ്യവും പ്രഖ്യാപിച്ചു. സി. എസ്. എസ് സംസ്ഥാന ജനറൽ സെക്രട്ടറി ബെന്നി പാപ്പച്ചൻ ഐക്യദാർഢ്യ പ്രഖ്യാപനം ഉദ്ഘാടനം ചെയ്തു. വൈസ് ചെയർമാൻ ഗ്ലാഡിൻ ജെ. പനക്കൽ, ബെൻഡിക്ട് കോയിക്കൽ, വി. എം. സേവിയർ, പി. എ. സാമുവൽ, സോണിയ ബിനു, വിവിധ നിയോജകമണ്ഡലം പ്രസിഡന്റുമാരായ കെ.എസ്. മൈക്കിൾ, ടി. എൽ. പീറ്റർ ആഞ്ചല, സാലു മാത്യു മുഞ്ഞനാട്ട്, പള്ളിപ്പുറം ഏരിയ പ്രസിഡന്റ് ജോൺ ഭക്തൻ എന്നിവർ സംസാരിച്ചു.