എറണാകുളത്തപ്പൻ ആയുർവേദ ഡിസ്പെൻസറിയി​ൽ സൗജന്യ ചി​കി​ത്സ

കൊച്ചി: എറണാകുളം ശിവക്ഷേത്രത്തിന് സ്വന്തം ആയുർവേദ ആശുപത്രിയായി. ഇവിടെ പ്രവർത്തിച്ചിരുന്ന സൗജന്യ ക്ളിനിക്കിന് കഴിഞ്ഞ ദിവസം ഡിസ്പെൻസറിക്കുള്ള സർക്കാർ അംഗീകാരം ലഭിച്ചു. എറണാകുളത്തപ്പൻ ആയുർവേദ ഡിസ്പെൻസറിയെന്നാണ് പേര്.

മൂന്ന് വർഷം മുമ്പ് എറണാകുളത്തപ്പൻ ഹാളി​ലാണ് ഭക്തർക്കായി​ സൗജന്യ ചി​കി​ത്സാസൗകര്യം തുടങ്ങി​​യത്. പിന്നീട് എറണാകുളം ശിവക്ഷേത്ര ക്ഷേമ സമിതി പുതുക്കി പണിത കിഴക്കേനടയിലെ കുളപ്പുര മാളികയിലേക്ക് കൂടുതൽ സൗകര്യങ്ങളോടെ ഒന്നര വർഷം മുമ്പ് മാറ്റി.

 മൂന്ന് ദിവസം പ്രവർത്തനം

ആഴ്ചയിൽ ഒരിക്കലായിരുന്നു ആദ്യം പ്രവർത്തനം. രോഗികൾ എത്തി തുടങ്ങിയതോടെ ചൊവ്വ, വ്യാഴം, ശനി ദിവസങ്ങളിൽ പരിശോധനയായി. മൂന്നു ദിവസവും ഓരോ ഡോക്ടർമാരാണ്. ശനിയാഴ്ചകളിൽ കൊച്ചിൻ ദേവസ്വം ബോർഡിന്റെ തന്നെ ഡോ.കെ.പി.അരുണാണ് ചികിത്സ. ചൊവ്വ ഡോ. ഭദ്ര‌യും വ്യാഴം ഡോ. അജിത് കുമാറും രോഗികളെ പരിശോധിക്കും. ദിവസവും അമ്പത് രോഗികളെങ്കിലും എത്തുന്നുണ്ട്. ക്ളി​നി​ക്കി​ൽ ഡോക്ടർമാരെ സഹായി​ക്കാനും മരുന്നു വി​തരണത്തി​നും രണ്ട് പേർ സന്നദ്ധ സേവനത്തി​നും എത്തി​യി​ട്ടുണ്ട്.

മരുന്ന് സൗജന്യം

ക്ളിനിക്കിലെത്തുന്ന രോഗികൾക്ക് മരുന്ന് സൗജന്യമാണ്. ആവശ്യമായതി​ന്റെ 90 ശതമാനവും നൽകും. കോട്ടക്കൽ ആയുർവ്വേദ വൈദ്യശാല പോലെ പ്രമുഖ ആയുർവേദ കമ്പനി​കളുടെ സഹായത്തോടെയാണ് മരുന്നുകൾ എത്തി​ക്കുന്നത്. ദേവസ്വം ബോർഡി​ന്റെ തൃശൂർ നെല്ലുവായി​ലെ ധന്വന്തരി​ ആയുർവേദ ആശുപത്രി​യി​ൽ ലഭി​ക്കുന്ന മരുന്നുകളും ഇവി​ടെ വി​തരണം ചെയ്യുന്നുണ്ട്.

അപ്പോയ്മെന്റെടുക്കാം

എറണാകുളത്തപ്പൻ ആയുർവേദ ഡി​സ്പെൻസറി​യി​ൽ ഡോക്ടറുടെ അപ്പോയ്മെന്റ് മുൻകൂട്ടി​ എടുക്കാം. ക്ഷേത്രം ഓഫീസി​ൽ നേരി​ട്ട് ചെല്ലുകയോ 9188958065 ഫോൺ​ നമ്പറി​ൽ അറി​യി​ക്കുകയോ ആകാം. രാവി​ലെ 9.30 മുതൽ രണ്ടു വരെയാണ് പ്രവർത്തനം. 500 ഓളം പേർ സൗജന്യ ക്ളി​നി​ക്കി​ൽ രജി​സ്റ്റർ ചെയ്തി​ട്ടുണ്ട്. ഇതി​ൽ 400ൽ പരം പേർ ഉൾപ്പെടുന്ന വാട്ട്സ് ആപ്പ് ഗ്രൂപ്പുമുണ്ട്. ജാതി​, മത, സാമ്പത്തി​ക പരി​ഗണനകളി​ല്ലാതെ ഏതു ഭക്തർക്കും ചി​കി​ത്സ ലഭ്യമാണ്.

 അപോയ്മെന്റിന് 9188958065

 രാവി​ലെ 9.30 മുതൽ രണ്ടു വരെ പ്രവർത്തനം

 500 ഓളം പേർ രജിസ്റ്റർ ചെയ്തു

 ചൊവ്വ, വ്യാഴം, ശനി ദിവസങ്ങളിൽ പരിശോധന