അങ്കമാലി: നഗരസഭ 16-ാം വാർഡിലെ ടെമ്പിൾ റോഡിലെ വെള്ളക്കെട്ട് ഒഴിവാക്കാൻ ലക്ഷങ്ങൾ ചെലവഴിച്ചിട്ടും വെള്ളക്കെട്ടിന് മാത്രം പരിഹാരമായില്ല. മഴ പെയ്താൽ നായത്തോട് സ്കൂൾ ജംഗ്ഷനിൽ നിന്ന് ശിവ നാരായണ ക്ഷേത്രത്തിലേക്കുള്ള റോഡിലൂടെയുള്ള യാത്ര ദുഷ്കരമായി. സഹകരണ ബാങ്ക് ബ്രാഞ്ചിന് മുൻവശത്ത് മുട്ടറ്റം വെള്ളം പൊങ്ങും. വെള്ളക്കെട്ട് യാത്രതടസം സൃഷ്ടിക്കുന്നതിന് പുറമേ ആരോഗ്യ പ്രശ്നങ്ങൾക്കും കാരണമാകുന്നതായി നാട്ടുകാർ പറയുന്നു.

ഹയർ സെക്കൻഡറി സ്കൂൾ, വിവിധ മതസ്ഥരുടെ ആരാധനാലയങ്ങൾ, വായനശാലകൾ, സർവീസ് സഹകരണ ബാങ്കിന്റെ ബ്രാഞ്ച് ഓഫീസ് എന്നീ പ്രധാന കേന്ദ്രങ്ങളിലേക്ക് നിരവധി പേരാണ് ദിനംതോറും കാൽ നടയായും വാഹനങ്ങളിലും യാത്ര ചെയ്യുന്നത്. ലക്ഷങ്ങൾ ചെലവഴിച്ച് റോഡിന്റെ പുനരുദ്ധാരണം നടത്തിയെങ്കിലും തുക പാഴായതല്ലാതെ ഒരു ഫലവും കാണാൻ കഴിഞ്ഞിട്ടില്ല. ഈ റോഡുമായി ബന്ധപ്പെട്ട് നിരവധി പരാതികൾ ഇതിനകം തന്നെ അധികാരികൾക്ക് നൽകിയിട്ടും നടപടി ഉണ്ടായിട്ടില്ല. നഗരസഭാ അധികൃതരുടെ അനാസ്ഥയാണ് റോഡിന്റെ ശോചനീയാവസ്ഥയ്ക്ക് കാരണമെന്നാണ് നാട്ടുകാർ പറയുന്നത്.