മൂവാറ്റുപുഴ: മൂവാറ്റുപുഴയിൽ നഗരസഭയിൽ ഇനി 30 വാർഡുകൾ. നിലവിൽ 28വാർഡുകളാണ് മൂവാറ്റുപുഴ നഗരസഭയിൽ ഉണ്ടായിരുന്നത് . പുതുതായി 2 വാർഡുകൾ കൂട്ടിച്ചേർത്തു കരട് വിജ്‌ഞാപനം ഇറങ്ങി.

ഇതോടെ തീക്കൊള്ളിപ്പാറ, മുനിസിപ്പൽ കോളനി വാർഡുകൾ നഗരസഭയുടെ ഭൂപടത്തിൽ നിന്നില്ലാതായി. പകരം തൃക്ക, മണിയംകുളം, മിനി സിവിൽ സ്‌റ്റേഷൻ, വാഴപ്പിള്ളി വെസ്‌റ്റ് എന്നീ പേരുകളിൽ വാർഡുകൾ നിലവിൽ വന്നു.നഗരസഭ ഭരിക്കുന്ന യു .ഡി .എഫിന് രാഷ്ട്രീയമായി അനുകൂലമായ നിലയിലാണ് വാർഡ് വിഭജനത്തിന്റെ ഭാഗമായി വാർഡുകളുടെ അതിർത്തി പുനർനിർണയവും പുതിയ വാർഡുകളും രൂപീകരണവും നടന്നിരിക്കുന്നതെന്ന് ബി .ജെ .പിയും സി.പി.എമ്മും ആരോപിച്ചു. ഇതുമായി ബന്ധപ്പെട്ട വിവരങ്ങൾ ശേഖരിക്കാൻ ലോക്കൽ കമ്മിറ്റികളോടു പരിശോധന നടത്തി ഉടൻ റിപ്പോർട്ട് സമർപ്പിക്കാൻ സി .പി .എം ഏരിയ കമ്മിറ്റി നിർദേശം നൽകിയിട്ടുണ്ട്. വാർഡ് വിഭജനവുമായി ബന്ധപ്പെട്ട് വിശദ വിവരങ്ങൾ ശേഖരിക്കുകയാണെന്ന് ബി.ജെ.പി നേതൃത്വവും വ്യക്തമാക്കി.

പതിറ്റാണ്ടുകളോളം എൽ.ഡി.എഫ് ഭരണത്തിലിരുന്ന മൂവാറ്റുപുഴ നഗരസഭ കഴിഞ്ഞ തിരഞ്ഞെടുപ്പിലാണ് യു.ഡി.എഫ് പിടിച്ചെടുത്തത്.