തോപ്പുംപടി: ഹാർബർ പാലം നവീകരി​ച്ച് അടിപൊളിയാക്കും. എട്ട് ദിവസത്തെ അറ്റകുറ്റപ്പണി​യി​ൽ ടാറിംഗ്, ലൈറ്റുകളുടെ നവീകരണം ഉൾപ്പെടെ നടത്തും. രാത്രിയും പകലുമായാണ് ജോലി​. ഇതി​ന്റെ ഭാഗമായി​ ഇന്നുമുതൽ 28 വരെ പാലം അടച്ചിടും. പൊതുമരാമത്ത് ഫണ്ട് ഉപയോഗിച്ചാണ് നവീകരണം നടത്തുന്നത്.

പാലത്തിന്റെ ഇരുവശത്തെ കമ്പികൾ ഇളകിപ്പോയതിനാൽ അറവുശാലയി​ലെ മാലിന്യം ഉൾപ്പെടെയുള്ളവ കായലിലേക്ക് തള്ളുന്നത് പതിവായി. പാലത്തിന്റെ താഴെയുള്ള ഭാഗം സാമൂഹി​കവിരുദ്ധർ കൈയടക്കിയിരിക്കുകയാണ്. രാത്രിയും പകലും പൊലീസ് പട്രോളിംഗ് ഇവിടെ ഏർപ്പെടുത്തും.

പാലം അടക്കുന്നതോടെ ബി.ഒ.ടി പാലത്തിലും കണ്ണങ്ങാട്ട് - ഐലൻഡ് പാലത്തിലും തിരക്കേറും. ടു, ത്രീ, ഫോർവീലറുകൾ മാത്രമാണ് ഹാർബർ പാലം വഴി പോയിരുന്നത്. ടാറിംഗ് ഇളകി വൻ കുഴികളാണ് പാലത്തിൽ രൂപപ്പെട്ടിരിക്കുന്നത്. ഇതോടെ നിരവധി അപകടങ്ങൾ സംഭവിച്ചതിനെ തുടർന്ന് കെ.ജെ. മാക്സി എം.എൽ.എ ഇടപെട്ടാണ് നവീകരണജോലി​കൾ വേഗത്തി​ലാക്കി​യത്. 30 ലക്ഷം രൂപയാണ് ചെലവ് കണക്കാക്കുന്നത്. റീ ടാറിംഗ് നടത്തിയതിനുശേഷം മറ്റു ജോലികളും പൂർത്തി​യാക്കുമെന്ന് പൊതുമരാമത്ത് ഉദ്യോഗസ്ഥർ പറഞ്ഞു.