ചെറുതോണി: കഞ്ഞിക്കുഴിയിൽ വീട്ടിൽ കയറിയ രാജവെമ്പാലയെ വനപാലകർ പിടികൂടി. ഏഴുകമ്പി വാളിയപ്ലാക്കൽ ജെയിംസിന്റെ വീടിനുള്ളിലാണ് രാജവെമ്പാല കയറിയത്. ഇന്നലെ വൈകിട്ട് നാലരയോടെയാണ് മുറിക്കുള്ളിലെ ഇരുമ്പലമാരയ്ക്ക് മുകളിൽ കയറിയിരുന്ന രാജവെമ്പാലയെ വീട്ടുകാർ കണ്ടത്. ഉടൻ തന്നെ വനപാലകരെ വിവരം അറിയിച്ചു. നഗരംപാറ റേഞ്ച് വാഴത്തോപ്പ് ഫോറസ്റ്റ് സ്റ്റേഷൻ ഉദ്യോഗസ്ഥരുടെ നേതൃത്വത്തിൽ കോതമംഗലം വനംഡിവിഷനിലെ പാമ്പുപിടുത്ത വിദഗ്ദ്ധൻ ഷൈൻ എത്തിയാണ് രാജവെമ്പാലയെ പിടികൂടിയത്. പാമ്പിനെ പിന്നീട് ഇടുക്കി വനത്തിൽ തുറന്നു വിട്ടു. വാഴത്തോപ്പ് ഫോറസ്റ്റ് സ്റ്റേഷൻ ഡിവൈ.ആർ.എഫ്.ഒമാരായ എം. മുനസിർ അഹമ്മദ്, പി.കെ. ഗോപകുമാർ, ബീറ്റ് ഫോറസ്റ്റ് ഓഫീസർമാരായ എസ്. സുബീഷ്, അരുൺ രാധാകൃഷ്ണൻ, സ്‌നേക് റെസ്‌ക്യൂ ടീം അംഗങ്ങളായ കെ.എം. രാജു, മനു മാധവൻ എന്നിവർ നേതൃത്വം നൽകി.