കട്ടപ്പന :വിവിധ ആവശ്യങ്ങളുന്നയിച്ച് കേരള വ്യാപാരി വ്യവസായി സമിതിയുടെ നേതൃത്വത്തിൽ ജില്ലാ വൈസ് പ്രസിഡന്റ് മജീഷ് ജേക്കബ് നാളെ രാവിലെ 10.30 ന് കട്ടപ്പന നഗരസഭ ഓഫീസ് പടിക്കൽ ഉപവാസ സമരം നടത്തും. ജില്ലാ സെക്രട്ടറി സാജൻ കുന്നേൽ ഉദ്ഘാടനം ചെയ്യും. ജില്ലാ പ്രസിഡന്റ് റോജി പോൾ, ട്രഷറർ നൗഷാദ് ആലുംമൂട്ടിൽ, കട്ടപ്പന റൂറൽ ഡെവലപ്‌മെന്റ് സൊസൈറ്റി മുൻ പ്രസിഡന്റ് വി ആർ സജി, സമിതി ജില്ലാ വൈസ് പ്രസിഡന്റ് ധനേഷ് കുമാർ, ജോസ് പുലിക്കോടൻ, ഷിജു ഉള്ളുരുപ്പേൽ, വി എ അൻസാരി, ഷിജു തനിമ, ജി എസ് ഷിനോജ്, എം ആർ അയ്യപ്പൻകുട്ടി, ടോമി ജോർജ്, ടിജി എം രാജു, നഗരസഭ കൗൺസിലർമാർ, സമിതി നേതാക്കൾ തുടങ്ങിയവർ സംസാരിക്കും. പച്ചക്കറി, മത്സ്യമാംസ മാർക്കറ്റുകളിലെ റോഡുകൾ ഗതാഗതയോഗ്യമാക്കുക, പഴയ ബസ് സ്റ്റാൻഡ്, പുതിയ സ്റ്റാൻഡ് റോഡുകൾ സഞ്ചാരയോഗ്യമാക്കുക, പുതിയ ബസ് സ്റ്റാൻഡ് ടെർമിനൽ അറ്റകുറ്റപ്പണി നടത്തുക, വ്യാപാരികൾക്ക് അടിസ്ഥാന സൗകര്യങ്ങൾ ഒരുക്കുക, അനധികൃത വഴിയോര കച്ചവടം തടയുക, ഇതിന്റെ മറവിലുള്ള ലഹരി ഉൽപ്പന്നങ്ങളുടെ വിൽപ്പന തടയുക തുടങ്ങിയ ആവശ്യങ്ങളുന്നയിച്ചാണ് സമരം.