രാജാക്കാട്: മുല്ലക്കാനത്ത് പ്രവർത്തിക്കുന്ന രാജാക്കാട് സാമൂഹ്യാരോഗ്യ കേന്ദ്രത്തിൽ ആവശ്യമായ ഡോക്ടർമാരെയും മറ്റു ജീവനക്കാരെയും നിയമിക്കുക, കിടത്തി ചികിത്സ പുനരാരംഭിക്കുക എന്നീ ആവശ്യങ്ങൾ ഉന്നയിച്ച് യു.ഡി.എഫ് രാജാക്കാട് പഞ്ചായത്ത് കമ്മിറ്റിയുടെ നേതൃത്വത്തിൽ 12ന് രാവിലെ 10ന് മുല്ലക്കാനം സി.എച്ച്.സി പടിക്കലേക്ക് പ്രതിഷേധ മാർച്ചും ധർണ്ണയും സംഘടിപ്പിക്കുമെന്ന് യു.ഡി.എഫ് ഭാരവാഹികളായ സിബി കൊച്ചുവള്ളാട്ട്, ജോഷി കന്യാക്കുഴി, ജമാൽ ഇടശ്ശേരിക്കുടി, ജോസ് ചിറ്റടി, കെ.എസ്. ശിവൻ എന്നിവർ പറഞ്ഞു. 40 വർഷം മുമ്പ് പ്രാഥമികാരോഗ്യ കേന്ദ്രമായി തുടങ്ങിയ ആതുരാലയത്തിൽ നാളിതുവരെയായിട്ടും ഡോക്ടർമാരുടെയും നഴ്സുമാരുടെയും മറ്റു ജീവനക്കാരുടെയും ഒഴിവുകൾ നികത്തിയിട്ടില്ല. പഞ്ചായത്ത് മുതൽ സംസ്ഥാനം വരെ ഇടതുപക്ഷം ഭരണം നടത്തുമ്പോൾ ആറ് പഞ്ചായത്തുകൾക്ക് ചികിത്സാ സഹായം ലഭിക്കേണ്ട ആശുപത്രിക്കെതിരെയുള്ള അവഗണന അവസാനിപ്പിക്കണമെന്നും ഇടതുപക്ഷത്തെ പ്രമുഖനായ മുൻ മന്ത്രി എം.എം. മണിയുടെ മണ്ഡലത്തിലെ ആരോഗ്യ കേന്ദ്രത്തിനാണ് ഈ അവഗണനയെന്നും നേതാക്കൾ പറഞ്ഞു. രാവിലെ 10ന് മുല്ലക്കാനം ടൗണിൽ നിന്നാരംഭിക്കുന്ന പ്രതിഷേധ ജാഥ സമാപിക്കുമ്പോൾ നടക്കുന്ന ധർണ്ണ കെ.പി.സി.സി അംഗം ആർ. ബാലൻപിള്ള ഉദ്ഘാടനം ചെയ്യും. എം.പി ജോസ്, ഒ.എസ്. ജോസഫ് സുധീർ കോട്ടക്കുടി, ഷാജി അമ്പാട്ട്, കെ.വി. മോഹനൻ എന്നിവർ പ്രസംഗിക്കും.