കട്ടപ്പന : കട്ടപ്പന നഗരസഭയെ വെളിയിട വിസർജന വിമുക്ത (ഒ.ഡി.എഫ് പ്ലസ്) നഗരസഭയായി പ്രഖ്യാപിച്ചു. ചെയർപേഴ്സൺ ബീനാ ടോമിയുടെ അദ്ധ്യക്ഷതയിൽ ചേർന്ന യോഗത്തിൽ കൗൺസിൽ അംഗങ്ങളും ഉദ്യോഗസ്ഥരും പങ്കെടുത്തു. മാനദണ്ഡങ്ങൾ പാലിച്ചശേഷമാണ് ഒ.ഡി.എഫ് പ്ലസ് പ്രഖ്യാപനം നടത്തിയത്. 34 വാർഡുകളിലും പ്രഖ്യാപനം നടത്തിയിരുന്നു. തുറസായ സ്ഥലങ്ങളിലും പൊതു ഇടങ്ങളിലും മല മൂത്ര വിസർജനം നടത്തുന്നവർക്കെതിരെ കർശന നടപടി സ്വീകരിക്കുമെന്നും 1000 രൂപ വരെ പിഴ ഈടാക്കുമെന്നും നഗരസഭ സെക്രട്ടറി അറിയിച്ചു. പൊതുഇടങ്ങൾ വൃത്തിയായി സൂക്ഷിക്കുന്നതിനും ജൈവ അജൈവ മാലിന്യങ്ങൾ തരം തിരിക്കുകയും ജൈവ മാലിന്യം ഉറവിടത്തിൽ സംസ്‌കരിക്കുന്നതിനും അജൈവ മാലിന്യം ശാസ്ത്രീയ സംസ്‌കരണത്തിന് ഹരിതകർമ സേനയ്ക്ക് കൈമാറുന്നതിനും കൃത്യമായി യൂസർ ഫീ നൽകുന്നതിനും ശ്രദ്ധ ചെലുത്തണമെന്ന് നഗരസഭാ അധികൃതർ അറിയിച്ചു.