കട്ടപ്പന: ശമ്പള കുടിശികയെ തുടർന്ന് അയ്യപ്പൻകോവിൽ അയ്യരുപാറ നെടുംപറമ്പിൽ എസ്റ്റേറ്റിൽ തൊഴിലാളികൾ കുടിൽക്കെട്ടി താമസം ആരംഭിച്ചു. വിവിധ യൂണിയനുകളുടെ നേതൃത്വത്തിലാണ് തൊഴിലാളികൾ ഭൂമി കൈവശപ്പെടുത്തിയത്. മൂന്ന് വർഷമായി ഇവർക്ക് ശമ്പളം മുടങ്ങിയിട്ട്. 315 തൊഴിലാളികൾക്ക് ശമ്പളകുടിശിക, ഗ്രാറ്റിവിറ്റി,​ ബോണസ് എന്നീയിനത്തിൽ 15 കോടിയോളം രൂപയാണ് ലഭിക്കാനുള്ളത്. പലതവണ തോട്ടം ഉടമയെ സമീപിച്ചിട്ടും ശമ്പളം നൽകാൻ തയ്യാറായില്ല. ഇതോടെ കടുത്ത പട്ടിണിയിലാണ് ഈ കുടുംബങ്ങൾ. കൈവശപ്പെടുത്തിയ ഭൂമിയിൽ കൃഷിയിറക്കാനാണ് തൊഴിലാളികളുടെ തീരുമാനം. അടിയന്തരമായി വിഷയത്തിൽ മാനേജ്മെന്റ് ഇടപെട്ടില്ലെങ്കിൽ വരും ദിവസങ്ങളിൽ സമരം കൂടുതൽ ശക്തിപ്പെടുത്താനാണ് തീരുമാനമെന്ന് ട്രേഡ് യൂണിയൻ ഭാരവാഹികൾ പറഞ്ഞു.