ഇടിക്കി: ലോക ശൗചാലയദിനാചരണ പരിപാടികളുടെ ഭാഗമായി വിവിധ പ്രവർത്തനങ്ങളുടെ ജില്ലാതല ഉദ്ഘാടനം കളക്ടർ വി. വിഗ്‌നേശ്വരി നിർവഹിച്ചു. കളക്ടറേറ്റ്‌ കോൺഫറൻസ് ഹാളിൽ നടന്ന മാലിന്യമുക്ത നവകേരളം ജനകീയ ക്യാമ്പയിന്റെ ശിൽപശാലയോടനുബന്ധിച്ചാണ് പരിപാടി നടന്നത്. ജില്ലയിൽ എല്ലായിടത്തും ഗാർഹിക ശൗചാലയങ്ങൾ ഉറപ്പുവരുത്തുക, പൊതുശുചിമുറി സംവിധാനങ്ങളുടെ ലഭ്യതയും ഗുണനിലവാരവും ഉറപ്പുവരുത്തുക എന്നീ ലക്ഷ്യങ്ങളോടെയാണ് ശൗചാലയദിനാചരണ പ്രവർത്തനങ്ങൾ സംഘടിപ്പിക്കുന്നത്. ഗ്രാമീണമേഖലയിൽ വ്യക്തിഗത ശൗചാലയങ്ങൾ ഇല്ലാത്ത കുടുംബങ്ങൾക്ക് അവ നൽകുന്നതിന് തദ്ദേശസ്ഥാപന അടിസ്ഥാനത്തിൽ സർവേ, രജിസ്‌ട്രേഷൻ ഡ്രൈവുകൾ എന്നിവ സംഘടിപ്പിക്കുക, ഉപയോഗ ക്ഷമമല്ലാത്ത പൊതുശുചിമുറികൾ കണ്ടെത്തി പരിഹരിക്കുന്നതിനുള്ള നടപടികൾ, ശുചീകരണ തൊഴിലാളികളെ ആദരിക്കൽ എന്നിവയാണ് ഇതോടനുബന്ധിച്ച് നടക്കുക. നിലവിൽ ഉപയോഗക്ഷമമായ ശുചിമുറികൾ ഇല്ലാത്ത അർഹരായ കുടുംബങ്ങൾക്ക് അതത് തദ്ദേശസ്ഥാപനങ്ങളുമായി ബന്ധപ്പെട്ട് ശൗചാലയ നിർമ്മാണത്തിനുള്ള ഫണ്ട് ശുചിത്വമിഷൻ അനുവദിക്കുന്നതാണെന്ന് ജില്ലാ ശുചിത്വ മിഷൻ കോർഡിനേറ്റർ അറിയിച്ചു. തദ്ദേശസ്വയംഭരണ വകുപ്പ് അഡീഷണൽ ഡയറക്ടർ എം.പി. അജിത്ത് കുമാർ, സംസ്ഥാന ശുചിത്വ മിഷൻ ഡയറക്ടർ (കുടിവെള്ളം) മുഹമ്മദ് ജാ, ഹരിതകേരളം സംസ്ഥാന മിഷൻ ഓഫീസർമാരായ രാജേന്ദ്രൻ. വി, എബ്രഹാം കോശി, ആർ.വി. സതീഷ്, തദ്ദേശസ്വയംഭരണ വകുപ്പ് ജില്ലാ ജോയിന്റ് ഡയറക്ടർ ട്രീസ ജോസ്, അസിസ്റ്റന്റ് ഡയറക്ടർ ശ്രീലേഖ, ജില്ലാ ശുചിത്വ മിഷൻ കോർഡിനേറ്റർ കെ.ആർ. ഭാഗ്യരാജ്, നവകേരളം കർമ്മ പദ്ധതി ജില്ലാ കോർഡിനേറ്റർ അജയ് പി. കൃഷ്ണ എന്നിവർ പങ്കെടുത്തു.