പീരുമേട്: ഗോവയിൽ നടക്കുന്ന 55മത്തെ രാജ്യാന്തര ചലച്ചിത്ര മേള (ഐ എഫ് എഫ് ഐ) കുട്ടിക്കാനം മരിയൻ കോളേജിലെ മാധ്യമ പഠന വിദ്യാർത്ഥികൾക്ക് നവ്യാനുഭവമായി മാറി. വിദ്യാർത്ഥികളും അദ്ധ്യാപകരും എല്ലാ വർഷവും ചലച്ചിത്ര മേളയിൽ പങ്കെടുക്കാറുണ്ട്. ചലച്ചിത്രങ്ങൾ കണ്ട് ആസ്വദിക്കുക മാത്രമല്ല അവയെ വിമർശനാത്മകമായി വിശകലനം നടത്താനും നിരൂപണം ചെയ്യാനുമുള്ള പരിശീലന കളരി കൂടിയാണ് ഇത്തരം മേളകൾ എന്ന് വിദ്യാർത്ഥികളെ അനുഗമിക്കുന്ന അദ്ധ്യാപകരായ ആൻസൻ തോമസും കാർമൽ മരിയ ജോസും പറഞ്ഞു.മേളയുടെ ഭാഗമായി നടക്കുന്ന ഓപ്പൺ ഫോറത്തിലും മാസ്റ്റർ ക്ലാസുകളിലും വിദ്യാർത്ഥികൾ സജീവമായി പങ്കെടുക്കുന്നുണ്ട്. ഫിലിം ക്യൂറേഷൻ എന്ന കോഴ്സിന്റെ ഭാഗമായി ഇവർ ഗോവയിലും, തിരുവനന്തപുരത്തും, നടക്കുന്ന അന്തർദേശീയ ചലച്ചിത്രമേളകളിൽ എല്ലാ വർഷവും പങ്കെടുക്കാറുണ്ട്. കോളേജിൽ എല്ലാവർഷവും നടത്തിവരുന്ന കുട്ടിക്കാനം രാജ്യാന്തര ചലച്ചിത്രമേളയുടെ സംഘാടനത്തിലൂടെ നേടിയെടുത്ത അനുഭവം ഗോവയിലെ മേളയിൽ ക്രിയാത്മക സാന്നിധ്യമാകാൻ സഹായകമാകുന്നുണ്ട്.