ചെറുവത്തൂർ : ഹോട്ടലിൽ വിളമ്പിയ ഭക്ഷണത്തിൽ പുഴു കണ്ടെത്തിയെന്ന പരാതിയെ തുടർന്ന് ചെറുവത്തൂർ യൂണിറ്റി ഹോസ്പിറ്റലിന് സമീപത്തെ മാ പാർക് റെസ്റ്റാറന്റിൽ ആരോഗ്യ വകുപ്പും ഗ്രാമപഞ്ചായത്ത് അധികൃതരും സംയുക്തപരിശോധന നടത്തി.പരിശോധനയിൽ പഴകിയതും പാചകം ചെയ്തതുമായ ചിക്കൻ, ബീഫ് അടക്കമുള്ള മാംസവും പഴകിയതും വൃത്തിഹീനവുമായ രീതിയിൽ ഫ്രീസറിൽ സൂക്ഷിച്ചതുമായ പഴംപൊരി,പത്തൽ, അരിമാവുകൾ, എന്നിവയും ഉദ്യോഗസ്ഥർ കണ്ടെത്തി. പരിശോധനയിൽ ഹോട്ടലും പരിസരവും വൃത്തിഹീനമാണെന്ന് പരിശോധനയിൽ ബോദ്ധ്യപ്പെട്ടതിനെ തുടർന്ന് പ്രവർത്തനം താത്കാലികമായി നിർത്തിവെപ്പിച്ചു.നിയമനടപടികളുമായി മുന്നോട്ടു പോകുമെന്ന് പഞ്ചായത്ത് അധികൃതരും ആരോഗ്യ വകുപ്പും അറിയിച്ചു. ഹെൽത്ത് ഇൻസ്പെക്ടർമാരായ പി.കെ മധു, ടി.കെ.അഭിജിത്ത് കുമാർ പരിശോധനയ്ക്ക് നേതൃത്വം നല്കി.