കണ്ണൂർ: ഹരിത ശുചിത്വ സുന്ദര ജില്ലയെന്ന അവസ്ഥയിലേക്കെത്താൻ ആറ് മേഖലകളിൽ കണ്ണൂർ ജില്ലയ്ക്ക് പ്രത്യേക കർമ്മപദ്ധതി തയ്യാറായി. ഹരിത ടൗണുകൾ, ഹരിത പൊതുസ്ഥലങ്ങൾ, ഹരിത വിദ്യാലയങ്ങൾ,
ഹരിത സ്ഥാപനങ്ങൾ, ഹരിത ടൂറിസം കേന്ദ്രങ്ങൾ, ഹരിത കലാലയങ്ങൾ എന്നിങ്ങനെ വിവിധ ഘടകങ്ങളുടെ ഏകോപനത്തിലൂടെ സമ്പൂർണ ശുചിത്വ ജില്ല എന്ന ലക്ഷ്യം കൈവരിക്കുന്നതിനാണ് കർമ്മ പദ്ധതി തയ്യാറാക്കിയിട്ടുള്ളത്.
ജില്ലയിലെ ആകെയുള്ള 243 ടൗണുകളെയും ഹരിത ടൗണുകളാക്കി മാറ്റാൻ ശില്പശാലയിൽ കർമ്മ പരിപാടി തയ്യാറാക്കിയിട്ടുണ്ട്. 57 ടൗണുകളാണ് ജില്ലയിൽ ഇതിനകം ഹരിത പദവിയിലേക്ക് എത്തിയത്.
ബാക്കിയുള്ള 186 ടൗണുകൾ 2025 ജനുവരി 26നകം ഹരിത പദവിയിലേക്ക് എത്തിക്കാൻ കർമ്മ പദ്ധതി ലക്ഷ്യമിടുന്നു.
ജില്ലയിൽ മാർക്കറ്റുകളായും പൊതു സ്ഥലങ്ങളായും കണ്ടെത്തിയ 463 എണ്ണത്തിൽ 22 എണ്ണമാണ് ഹരിത പദവി കരസ്ഥമാക്കിയത്. ബാക്കിയുള്ള 441 മാർക്കറ്റുകളും പൊതുസ്ഥലങ്ങളും ഹരിത പദവിയിലേക്ക് 2024 ഡിസംബർ 31നകം എത്താനുള്ള ശ്രമങ്ങൾ കർമ്മ പദ്ധതിയിൽ ഉൾപ്പെടുത്തിയിട്ടുണ്ട്.
ജില്ലയിലെ 39 ടൂറിസം കേന്ദ്രങ്ങളെയും 2025 ജനവരി 26 നകം ഹരിത ടൂറിസം കേന്ദ്രങ്ങളായി മാറ്റാനുള്ള ശ്രമങ്ങൾ പൂർത്തീകരിക്കാനും ജില്ലയിൽ തദ്ദേശ ഭരണ സ്ഥാപനങ്ങൾ കർമ്മ പദ്ധതി തയ്യാറാക്കിയിട്ടുണ്ട്. കുടുംബശ്രീ അയൽകൂട്ടങ്ങൾക്കു ഹരിത പദവി നല്കുന്ന കാര്യത്തിൽ വിപുലമായ ഇടപെടൽ നടത്താനും ജില്ലാതല ശില്പശാലയിൽ കർമ്മ പദ്ധതി തയ്യാറാക്കിയിട്ടുണ്ട്. ജില്ലയിൽ ആകെയുള്ള ഇരുപതിനായിരം കുടുംബശ്രീ അയൽകൂട്ടങ്ങളിൽ 4947 എണ്ണം ഇതിനകം ഹരിത പദവി നേടിയിട്ടുണ്ട്.

കണ്ണൂർ ജില്ലാ ആസൂത്രണ സമിതി ഹാളിൽ നടന്ന രണ്ടാം ദിവസ ശില്പശാല തദ്ദേശ സ്വയംഭരണ വകുപ്പ് അഡീഷണൽ ഡയരക്ടർ ബി.കെ.ബലരാജ് ഉദ്ഘാടനം ചെയ്തു. തദ്ദേശ സ്വയംഭരണ വകുപ്പ് ജോയിന്റ് ഡയരക്ടർ അരുൺ അദ്ധ്യക്ഷത വഹിച്ചു. ശുചിത്വമിഷൻ സംസ്ഥാന പ്രതിനിധികളായ മെൽവിൻ ഡാനിയൽ, പൂജാ മേനോൻ, എഞ്ചിനീയർ ശ്യാമ പ്രസാദ്,
ഹരിത കേരളം ജില്ലാ മിഷൻ ജില്ലാ കോ ഓഡിനേറ്റർ ഇ.കെ.സോമശേഖരൻ, ശുചിത്വ മിഷൻ ജില്ലാ കോ ഓഡിനേറ്റർ കെ.എം സുനിൽ കുമാർ നേതൃത്വം നല്കി.

41 ഹരിത കലാലയങ്ങൾ,

980 വിദ്യാലയങ്ങൾ

കലാലയങ്ങളെ ഹരിത കലാലയങ്ങളായി മാറ്റാനുള്ള ശ്രമങ്ങൾക്കും ജില്ലാ ശില്പശാലയിൽ തുടക്കമിട്ടു .95 കലാലയങ്ങളാണ് ജില്ലയിൽ ഉള്ളത്. ഇതിൽ 41 എണ്ണം ഹരിതകലാലയ പദവി നേടി. ബാക്കി ഉള്ള 54 എണ്ണം ഡിസംബർ 31നകം ഹരിത പദവി നേടണം. അതിനുള്ള ശ്രമങ്ങൾക്കും കർമ്മ പദ്ധതിയിൽ ഇടം പിടിച്ചിട്ടുണ്ട്. 1629 വിദ്യാലയങ്ങളാണ് ജില്ലയിൽ ഉള്ളത്. ഇതിൽ 980 വിദ്യാലയങ്ങൾക്ക് ഹരിത പദവി ലഭിച്ചു. ബാക്കിയുള്ള 649 വിദ്യാലയങ്ങൾ കൂടി ഡിസംബർ 31നകം ഹരിത പദവി നേടുന്നതിനുള്ള പദ്ധതി പ്രവർത്തനങ്ങൾക്കും ശില്പശാല രൂപം നല്കി.