എരുമേലി: കോൺഗ്രസ് അംഗത്തെ കൂട്ടുപിടിച്ച് പഞ്ചായത്ത് ഭരണം ഇടതുപക്ഷം പിടിച്ചെടുത്തതിന് പിന്നാലെ കോൺഗ്രസ് പ്രാദേശിക നേതൃത്വം അച്ചടക്ക നടപടിയിലേക്ക്. കെ.പി.സി.സി, ഡി.സി.സി നേതൃത്വം എരുമേലിയിലെ പ്രാദേശിക നേതാക്കളുമായി ഓൺലൈൻയോഗം ചേർന്ന് സ്ഥിതിഗതികൾ വിലയിരുത്തി. കൂറുമാറിയവർക്കെതിരെ നടപടിയെടുക്കും. ഇടതുപക്ഷത്തേക്കു മാറിയ കോൺഗ്രസ് അംഗം സുബി സണ്ണിയെ പ്രാഥമികാംഗത്വത്തിൽ നിന്ന് നീക്കിയതിന് പിന്നാലെ സുബി പ്രതിനിധീകരിക്കുന്ന പമ്പാവാലി വാർഡിലെ വാർഡ് പ്രസിഡന്റ് ഉൾപ്പെടെ രണ്ടു പേരെ പാർട്ടിയിൽ നിന്ന് പുറത്താക്കിയെന്ന് ബ്ലോക്ക് കോൺഗ്രസ് പ്രസിഡന്റ് ബിനു മറ്റക്കര അറിയിച്ചു. ബിജു കായപ്ലാക്കൽ, ബോബൻ പള്ളിക്കൽ എന്നിവരെയാണ് പുറത്താക്കിയത്. കഴിഞ്ഞദിവസം നടന്ന പഞ്ചായത്ത് പ്രസിഡന്റ് തെരഞ്ഞെടുപ്പിൽ ഇടതുപക്ഷ പിന്തുണയോടെ സുബി സണ്ണി പ്രസിഡന്റായി തെരഞ്ഞെടുക്കപ്പെട്ടത് കോൺഗ്രസ് നേതൃത്വത്തിന് കനത്ത ആഘാതമായിരുന്നു. പാർട്ടി വിപ്പ് അനുസരിക്കാതെ വോട്ട് ചെയ്തത് ഉന്നയിച്ച് സുബി സണ്ണിയെ അയോഗ്യയാക്കണമെന്ന് ആവശ്യപ്പെട്ട് തെരഞ്ഞെടുപ്പ് കമ്മീഷനിൽ ഹർജി നൽകാൻ നേതൃത്വം തീരുമാനിച്ചിട്ടുണ്ട്.