മുണ്ടക്കയം : ജില്ലയിലെ ആദ്യ പൊലീസ് ക്യാന്റീനാണ് മുണ്ടക്കയത്തേത്. പക്ഷെ പറഞ്ഞിട്ടെന്ത് പ്രയോജനം അടഞ്ഞ് കിടക്കാനാണ് വിധി. പൂട്ടുവീണിട്ട് മൂന്നുവർഷമായി. 2020 ഫെബ്രുവരി അഞ്ചിനായിരുന്നു മുണ്ടക്കയം സ്റ്റേഷനോട് അനുബന്ധിച്ച് കാടുപിടിച്ചു കിടന്ന സ്ഥലം വെട്ടിത്തെളിച്ച് പുതിയ കെട്ടിടം പണിത് ക്യാന്റീൻ ആരംഭിച്ചത്. കൊട്ടാരക്കര - ദിണ്ഡിഗൽ ദേശീയപാതയോട് ചേർന്ന് 1500 സ്‌ക്വയർ അടിയിൽ നിർമ്മിച്ച ക്യാന്റീനിൽ 75 പേർക്ക് ഒരേസമയം ഭക്ഷണം കഴിക്കാമായിരുന്നു. മുകളിലെ നിലയിൽ 150 പേർക്ക് ഇരിക്കാവുന്ന കോൺഫറൻസ് ഹാളും. സ്റ്റേഷൻ ഹൗസ് ഓഫീസർ ഉൾപ്പെടെ ആറംഗ സമിതിക്കായിരുന്നു പ്രവർത്തന ചുമതല.

കെട്ടിടവും അനാഥം

പൊലീസുകാരുടെ സാമ്പത്തിക പങ്കാളിത്തത്തോടൊപ്പം നാട്ടിലെ സുമനസുകളുടെ സഹകരണവും ലഭ്യമായി. സാധാരണക്കാർക്കു കുറഞ്ഞ വിലയിൽ ഗുണനിലവാരമുള്ള ഭക്ഷണം ഉറപ്പാക്കുയായിരുന്നു ലക്ഷ്യം. പൊതുസമൂഹത്തിൽ നിന്ന് മികച്ച പിന്തുണയുമാണ് ലഭിച്ചത്. എന്നാൽ 2021 ൽ മുന്നറിയിപ്പില്ലാതെ അടച്ചുപൂട്ടി. ഇതിനായി നിർമ്മിച്ച കെട്ടിടവും അനാഥമായി.

ചെലവഴിച്ചത് : 32 ലക്ഷം രൂപ



''ക്യാന്റീൻ സാധാരണക്കാർക്ക് വേണ്ടി തുറന്നു കൊടുക്കണം. ശബരിമല തീർത്ഥാടന കാലമായതിനാൽ അയ്യപ്പഭക്തർക്കും ഇത് ഏറെ ആശ്വാസമാകും.

-ഗോപാലകൃഷ്ണൻ, പ്രദേശവാസി