ഒട്ടാവ: ഖാലിസ്ഥാൻ ഭീകരൻ ഹർദീപ് സിംഗ് നിജ്ജറിന്റെ വധവുമായി ബന്ധപ്പെട്ട് നയതന്ത്ര ഭിന്നത തുടരുന്നതിനിടെ ഇന്ത്യക്കെതിരെ വീണ്ടും വിവാദ പ്രസ്താവനയുമായി കാനഡ. കനേഡിയൻ സെന്റർ ഫോർ സൈബർ സെക്യൂരി​റ്റി കഴിഞ്ഞ ദിവസം പുറത്തുവിട്ട റിപ്പോർട്ടിൽ ഇന്ത്യയെ 'സൈബർ എതിരാളി' എന്നാണ് വിശേഷിപ്പിച്ചത്. റഷ്യ,​ ചൈന, ഉത്തര കൊറിയ, ഇറാൻ എന്നീ രാജ്യങ്ങളെയും ഈ വിഭാഗത്തിൽ ഉൾപ്പെടുത്തി.

ഇന്ത്യൻ സർക്കാരിന്റെ അറിവോടെ കനേഡിയൻ സർക്കാർ വെബ്‌സൈ​റ്റുകൾക്ക് നേരെ സൈബർ ആക്രമണങ്ങൾ നടക്കുന്നെന്നും ആരോപിച്ചു. സൈബർ സാങ്കേതിക വിദ്യയിലൂടെ രാജ്യത്തെ ഖാലിസ്ഥാൻവാദികളെ ഇന്ത്യ നിരീക്ഷിക്കുന്നെന്നും കൂട്ടിച്ചേർത്തു. ഇന്റലിജൻസ് ഏജൻസിയുടെ റിപ്പോർട്ടിനെ ചൂണ്ടിക്കാട്ടിയാണ് കാനഡയുടെ പുതിയ ആരോപണം.