ഈ കാലഘട്ടത്തിൽ മിക്ക വീടുകളിലും ഒരു വാഹനമെങ്കിലും കാണാതെ ഇരിക്കില്ല. കേരളത്തിൽ അടുത്തിടെയാണ് ഇലക്ട്രീക് വാഹനങ്ങൾ ശ്രദ്ധനേടിയത്. അതിന് മുൻപ് വരെ ഇന്ധനവാഹനമായിരുന്നു. അതിനാൽ തന്നെ ഇപ്പോഴും മിക്ക വീടുകളിലും ഡീസലോ പെട്രോളോ ഒഴിച്ച് ഓടുന്ന വാഹനങ്ങളാണ് ഉള്ളത്. ഇവയ്ക്ക് ഇന്ധനം നിറയ്ക്കാൻ പമ്പിൽ പോകാത്ത ആരും തന്നെ ഉണ്ടായിരിക്കില്ല. ചില പമ്പുകളിൽ നിങ്ങൾ കബളിപ്പിക്കപ്പെടുന്നുണ്ട്. എന്നാൽ അത് നിങ്ങൾക്ക് മനസിലാവുകയുമില്ല. ഇത്തരത്തിൽ ആളുകളെ കബളിപ്പിക്കാൻ പമ്പിൽ ഉപയോഗിക്കുന്ന ഒരു തന്ത്രമാണ് ജമ്പ് ട്രിക്ക്. അത് എന്താണെന്ന് നോക്കിയാലോ?

ജമ്പ് ട്രിക്ക്

മീറ്ററിൽ കൃത്രിമം കാണിച്ച് പണം നൽകുന്നതിന് കുറച്ച് ഇന്ധനം നൽകുന്ന രീതിയാണ് ജമ്പ് ട്രിക്ക്. ഉയർന്ന മീറ്റർ റീഡിംഗ് കാണിക്കാൻ പമ്പിലെ മീറ്റർ തകരാറിലാക്കുക, ഇന്ധനത്തിന്റെ ഫ്ലോറേറ്റിൽ കൃത്രിമം കാണിക്കുക എന്നിവ ജമ്പ് ട്രിക്കിൽ ഉൾപ്പെടും. ഇനി ജമ്പ് ട്രിക്കിൽ അകപ്പെടാതിരിക്കാനുള്ള അല്ലെങ്കിൽ അവ തിരിച്ചറിയാനുള്ള ചില വഴികൾ നോക്കാം.

ഇന്ധനം വിതരണം ചെയ്യുമ്പോൾ മീറ്റർ റീഡിംഗ് ഗണ്യമായി കുതിയ്‌ക്കുകയാണെങ്കിൽ അത് കൃത്രിമത്വത്തിന്റെ സൂചനയാണ്. ഇന്ധനം നിറയ്ക്കാൻ തുടങ്ങുന്നതിന് മുൻപ് മീറ്ററിൽ പൂജ്യമാണോ റീഡിംഗ് എന്ന് എപ്പോഴും ഉറപ്പാക്കുക. മീറ്റർ എങ്ങനെയാണ് നീങ്ങുന്നത് എന്ന് ശ്രദ്ധിക്കുക. ക്രമാനുഗതമായി മാത്രം വേണം റീഡിംഗ് കൂടേണ്ടത്. റീഡിംഗിൽ കാര്യമായ കുതിച്ചു ചാട്ടം ശ്രദ്ധയിൽപ്പെട്ടാൽ ഉടൻ തന്നെ മെഷീൻ നിർത്താൻ ഓപ്പറേറ്ററോട് ആവശ്യപ്പെടുക.