മലയാളികളുടെ തീൻമേശയിലെ ഒഴിവാക്കാനാവാത്ത വിഭവങ്ങളിലൊന്നാണ് പുട്ട്. അരിപ്പുട്ട്, ഗോതമ്പ് പുട്ട്, ഇറച്ചിപ്പുട്ട്, റാഗി പുട്ട്, റവ പുട്ട് എന്നിങ്ങനെ പുട്ട് വെറൈറ്റികൾ പലവിധമുണ്ട്. ആവിപറക്കുന്ന ചൂട് പുട്ടും കറിയും കഴിക്കാൻ ഇഷ്ടമില്ലാത്തവർ വിരളമായിരിക്കും. എന്നാൽ പുട്ട് തയ്യാറാക്കുമ്പോൾ ചിലരെങ്കിലും നേരിടുന്ന പ്രശ്നമാണ് പുട്ട് സോഫ്‌ട് ആകുന്നില്ല എന്നത്. രാവിലെ അൽപ്പമെങ്കിലും മൃദുലമായിരിക്കുന്ന പുട്ട് കുറച്ച് കഴിയുമ്പോൾ കട്ടിയായി പോകുന്നുവെന്ന പരാതികളും ഉണ്ട്. എന്നാലിനി വെള്ളം ചേർത്ത്, കൈ നനച്ച് പോലും കുഴയ്ക്കാതെ നല്ല സോഫ്‌ട് പുട്ട് എളുപ്പത്തിൽ തയ്യാറാക്കാം.

ഒരു പാത്രത്തിൽ പുട്ട് തയ്യാറാക്കാൻ ആവശ്യമായ മാവ് എടുക്കണം. ഇതിലേയ്ക്ക് അൽപം ഉപ്പ് ചേർത്ത് ഒന്ന് ഇളക്കികൊടുക്കാം. ഇനിയിത് മിക്‌സി ജാറിലിട്ട് കുറച്ച് തണുത്ത ചോറ് ചേർത്ത് ഒന്ന് കറക്കിയെടുക്കാം. ചൂട് ചോറ് ഉപയോഗിക്കരുത്. ഫ്രിഡ്‌ജിൽ വച്ച് തണുന്ന ചോറാണ് കൂടുതൽ നല്ലത്. മാവ് നല്ല പാകത്തിന് കുഴച്ച് കിട്ടും.

ഇനിയിത് പുട്ടുകുറ്റിയിൽ നിറച്ച് തേങ്ങാപ്പീരയും ചേർത്ത് ആവി കേറ്റിയെടുക്കാം. യാതൊരു മെനക്കേടുമില്ലാതെ മിനിട്ടുകൾക്കുള്ളിൽ ഇത്തരത്തിൽ നല്ല സോഫ്‌ട് പുട്ട് തയ്യാറാക്കാം. ചില മാവുകളിൽ ഉപ്പും വെള്ളവും ചേർത്ത് അര മണിക്കൂറെങ്കിലും മാറ്റി വയ്ക്കേണ്ടതുണ്ട്. എന്നാലിങ്ങനെ ചെയ്യുമ്പോൾ കാത്തുനിൽക്കാതെ തന്നെ ഉടനടി പുട്ട് തയ്യാറാക്കാം.