പാലക്കാട്: ഉപതിരഞ്ഞെടുപ്പിനായി ട്രോളി ബാഗിൽ കള്ളപ്പണം എത്തിച്ചെന്ന് ആരോപിച്ച് വനിതാ നേതാക്കൾ താമസിച്ചിരുന്ന മുറിയിൽ അർദ്ധരാത്രി പൊലീസ് പരിശോധന നടത്തിയത് വൻ വിവാദമായിരുന്നു. പാലക്കാട് നഗരത്തിലെ കെ.പി.എം റീജൻസി ഹോട്ടലിൽ ബിന്ദുകൃഷ്ണയും ഷാനിമോൾ ഉസ്മാനും തങ്ങിയ മുറിയിലായിരുന്നു റെയ്ഡ്.
നീല ട്രോളി ബാഗിൽ കോൺഗ്രസ് നേതാക്കൾ ഹോട്ടലിൽ പണം എത്തിച്ചുവെന്ന ആരോപണത്തിൽ ഉറച്ച് നിൽക്കുകയാണ് സിപിഎമ്മും ബിജെപിയും. സംഭവം ചർച്ചയായതിന് പിന്നാലെ നടൻ ഗിന്നസ് പക്രു ഫേസ്‌ബുക്കിലിട്ട ഒരു പോസ്റ്റും അതിന്‌ മണ്ഡലത്തിലെ യു ഡി എഫ് സ്ഥാനാർത്ഥി രാഹുൽ മാങ്കൂട്ടത്തിൽ നൽകിയ മറുപടിയുമാണ് സോഷ്യൽ മീഡിയയിൽ വൈറലായിക്കൊണ്ടിരിക്കുന്നത്.
സ്യൂട്ട് കേസ് പിടിച്ചുനിൽക്കുന്ന ഫോട്ടോയാണ് ഗിന്നസ് പക്രു പോസ്റ്റ് ചെയ്‌തത്. നൈസ് ഡേ എന്ന അടിക്കുറിപ്പോടെയായിരുന്നു പോസ്റ്റ്. ഇതിനുതാഴെ 'കെ പി എമ്മിൽ അല്ലല്ലോ' എന്ന് രാഹുൽ മാങ്കൂട്ടത്തിൽ കമന്റ് ചെയ്തിട്ടുണ്ട്. ഇതിനുതാഴെ നിരവധി പേരാണ് കമന്റ് ചെയ്‌തിരിക്കുന്നത്.
'കെപിഎമ്മിൽ ആണെങ്കിൽ തന്നെ ആ 12 മുറിയിൽ താമസിക്കരുത്', 'ഈ ബാഗ് ഒന്ന് പരിശോധിക്കണം', 'ഭാഗ്യം, നീല അല്ല',
'വേഗം മാറിക്കോ അണ്ണാ...ചന്ദ്രനിൽ നിന്ന് ഒരുത്തൻ ഇറങ്ങിയിട്ടുണ്ട്', 'ട്രോളി ബാഗ്,ദൈവമേ പക്രു ചേട്ടനും ട്രോൾ തുടങ്ങി'- തുടങ്ങി നിരവധി കമന്റുകളാണ് വന്നുകൊണ്ടിരിക്കുന്നത്.