കൊച്ചി: പ്രമുഖ വ്യവസായിയും ജോയ്ആലുക്കാസ് ഗ്രൂപ്പ് ചെയർമാനും മാനേജിങ് ഡയറക്ടറുമായ ജോയ് ആലുക്കാസിന്റെ ആത്മകഥ 'സ്‌പ്രെഡിംഗ് ജോയ് ഹൗ ജോയ് ആലുക്കാസ് ബികേം ദി വേൾഡ്സ് ഫേവറിറ്റ് ജുവലർ' എന്ന പുസ്തകം അറബി ഭാഷയിൽ പ്രകാശനം ചെയ്തു. ദുബായിൽ നടന്ന പരിപാടിയിൽ യുഎഇയുടെ ഫോറിൻ ട്രേഡ് സഹമന്ത്രി ഡോ. താനി ബിൻ അഹ്മദ് അൽ സെയൂദി മുഖ്യാതിഥിയായി. നിരവധി ബിസിനസ് സംരംഭകരെ വാർത്തെടുക്കാൻ സഹായിച്ച ദുബായ് നഗരത്തോടുള്ള ആദരക സൂചകമായാണ് അറബി പതിപ്പ് അവതരിപ്പിച്ചിരിക്കുന്നത്.
ഇന്ത്യയിൽ ആരംഭിച്ച്, യുഎഇയിൽ വളർന്ന ജോയ്ആലുക്കാസ് എന്ന സംരംഭം ലോകമെമ്പാടും പ്രശസ്തി നേടി എന്നത് ഏറെ അഭിമാനകരമാണെന്ന് യുഎഇയുടെ ഫോറിൻ ട്രേഡ് സഹമന്ത്രി ഡോ. താനി ബിൻ അഹ്മദ് അൽ സെയൂദി പറഞ്ഞു. സ്വർണ്ണ വ്യവസായത്തിന്റെ വളർച്ചയ്ക്ക് മികച്ച പിന്തുണ നൽകി യുഎഇയും ഇന്ത്യയും തമ്മിലുള്ള വാണിജ്യ ബന്ധം ശക്തിപ്പെടുത്താൻ ജോയ് ആലുക്കാസ് ഏറെ സഹായിച്ചിട്ടുണ്ട്. ഇത്തരത്തിൽ വിജയകരമായ ബിസിനസ്സ് നേതാക്കൾ കൊണ്ടുവന്ന പ്രചോദനത്തെയും ഐക്യത്തെയും കുറിച്ച് പുസ്തകം പറയുമെന്ന് എനിക്ക് ഉറപ്പുണ്ടെന്നും അദ്ദേഹം കൂട്ടിച്ചേർത്തു.
അറബ് ലോകത്തേക്ക് 'സ്‌പെഡിംഗ് ജോയ്' എത്തിക്കണമെന്നത് ഒരു സ്വപ്നമായിരുന്നെന്നും, എന്നെപ്പോലെ തന്നെ നിരവധി ആളുകളുടെ സ്വപ്നങ്ങൾ സാക്ഷാത്ക്കരിക്കാൻ യുഎഇ സഹായിച്ചിട്ടുണ്ടെന്നും ജോയ് ആലുക്കാസ് പറഞ്ഞു. ബിസിനസിന് അനുകൂലമായ അന്തരീക്ഷം സൃഷ്ടിച്ചതിന് ഈ രാഷ്ട്രത്തിലെ നേതാക്കളോടുള്ള നന്ദിസൂചകം കൂടിയാണ് ഈ പുസ്തകം. എല്ലാ വായനക്കാർക്കും പിന്തുണച്ചവർക്കും നന്ദി രേഖപ്പെടുത്തുവാൻ ഈ അവസരം ഉപയോഗിക്കുന്നുവെന്നും അദ്ദേഹം പറഞ്ഞു.
തൃശ്ശൂർ ജില്ലയിൽ ആരംഭിച്ച്, മികച്ച നേതൃപാടവത്തിലൂടെയും, ഉപഭോക്താക്കളോടുള്ള പ്രതിബദ്ധതയിലൂടെയും ജോയ്ആലുക്കാസ് എന്ന ബ്രാൻഡിനെ ആഗോളതലത്തിൽ പ്രശസ്തമാക്കിയ ജോയ് ആലുക്കാസിന്റെ സംരംഭകത്വയാത്രയാണ് സ്‌പെഡിംഗ് ജോയ് എന്ന പുസ്തകത്തിൽ പറയുന്നത്. യുഎഇയിലും മറ്റ് സ്ഥലങ്ങളിലും അറബി പതിപ്പ് ലഭ്യമാണ്.