ന്യൂഡൽഹി: റീൽസ് എടുക്കാനും സിനിമ നിർമിക്കാനും ആഗ്രഹമുളളവരാണോ നിങ്ങൾ? എങ്കിൽ നിങ്ങൾക്കായി ഒരു സുവർണാവസരം വന്നെത്തിയിരിക്കുകയാണ്. നിങ്ങൾക്കായി നമോ ഭാരത് ഷോർട്ട് ഫിലിം മേക്കിംഗ് കോമ്പ​റ്റീഷൻ ഒരുക്കിയിരിക്കുകയാണ് നാഷണൽ ക്യാപി​റ്റൽ റീജിയൺ ട്രാൻസ്‌പോർട്ട് കോർപറേഷൻ (എൻസിആർടിസി). ഹ്രസ്വചിത്രം നിർമിക്കാൻ ആഗ്രഹിക്കുന്നവർക്കാണ് അവസരം.

നിങ്ങൾ ഒരു വിദ്യാർത്ഥിയോ സിനിമാമോഹിയോ ആയിക്കോട്ടെ. ആർക്കുവേണമെങ്കിലും ഷോർട്ട് ഫിലിം മത്സരത്തിൽ പങ്കെടുക്കാവുന്നതാണ്. നമോ ഭാരത് ട്രെയിനും റീജിയണൽ ട്രാൻസ്‌പോർട്ട് സിസ്​റ്റം (ആർആർടിഎസ്) എന്നീ ഘടകങ്ങളെ അടിസ്ഥാനമാക്കിയാണ് ഷോർട്ട് ഫിലിം തയ്യാറാക്കേണ്ടത്. മത്സരാർത്ഥികൾക്ക് അവരുടേതായ സർഗാത്മകതയിൽ ഷോർട്ട് ഫിലിം ചെയ്യാൻ സ്വാതന്ത്ര്യമുണ്ട്. യാതൊരു മാനദണ്ഡങ്ങളും ബാധകമല്ല.

ഷോർട്ട് ഫിലിമുകൾ ചിത്രീകരിക്കാൻ എല്ലാവിധ സഹായങ്ങളും എൻസിആർടിസി ഒരുക്കുന്നുണ്ട്. മത്സരാർത്ഥികൾക്ക് ആർആർടിഎസ് സ്​റ്റേഷനുകളിലും നമോ ഭാരത് ട്രെയിനുകളിലും സൗജന്യമായി ഷൂട്ടിംഗും നടത്താം. ഈ ലൊക്കേഷനുകളിൽ ഉയർന്ന നിലവാരത്തിലുളള കണ്ടന്റുകൾ നിങ്ങൾക്ക് സൃഷ്ടിക്കാനാകുമെന്നും എൻസിആർടിസി വ്യക്തമാക്കുന്നുണ്ട്.

മത്സരത്തിനായി എങ്ങനെ അപേക്ഷിക്കാം
മത്സരാർത്ഥികൾക്ക് ഹിന്ദിയിലോ ഇംഗ്ലീഷിലോ ബന്ധപ്പെട്ട ഭാഷകളിലോ സിനിമ പ്രദർശിപ്പിക്കാവുന്നതാണ്. എംപി4,എംഒവി എന്നീ ഫോർമാ​റ്റിലും 1080പി റെസല്യൂഷനിലുമാണ് സിനിമ ചിത്രീകരിക്കേണ്ടത്. ഡിസംബർ 20 വരെയാണ് അവസരം.

pr@nrtc.in എന്ന ഈമെയിലിൽ ആപ്ലിക്കേഷൻ ഫോർ നമോ ഭാരത് ഷോർട്ട് ഫിലിം കോമ്പ​റ്റീഷൻ എന്ന സബ്ജക്ട് ലൈനിൽ രേഖപ്പെടുത്തണം. ഈമെയിലിൽ മത്സരാർത്ഥിയുടെ കൃത്യമായ പേര്, നൂറ് വാക്കിൽ കവിയാതെ ഷോർട്ട് ഫിലിമിന്റെ സംഗ്രഹം, സിനിമയുടെ ദൈർഘ്യം എന്നിവ ഉൾപ്പെടുത്തണം.

സമ്മാനം
ആദ്യമൂന്ന് സ്ഥാനങ്ങൾക്കാണ് സമ്മാനമുളളത്.

ആദ്യ സമ്മാനം- ഒന്നര ലക്ഷം
രണ്ടാം സ്ഥാനം- ഒരു ലക്ഷം
മൂന്നാ സമ്മാനം -50,000
എൻസിആർടിസിയുടെ ഔദ്യോഗിക വെബ്‌സൈറ്റിൽ പ്രവേശിച്ച് കൂടുതൽ വിവരങ്ങൾ മനസിലാക്കാവുന്നതാണ്.