ഉപയോക്താക്കൾക്ക് വളരെയേറെ പ്രയോജനം ചെയ്യുന്ന പുതിയ അപ്‌ഡേറ്റുമായി വാട്സാപ്പ്. മെസേജ് ഡ്രാഫ്റ്റ്, ടൈപ്പ് ചെയ്‌ത് പാതിവഴിയിലായ സന്ദേശങ്ങൾ നഷ്‌ടപ്പെടില്ല എന്നതാണ് ഈ പുത്തൻ അപ്‌ഡേറ്റിന്റെ പ്രത്യേകത. യൂസർ എക്‌സ്‌പീരിയൻസും ആശയവിമിനയത്തിലെ കാര്യക്ഷമതയും ഉറപ്പുവരുത്തുക എന്നതാണ് പുത്തൻ അപ്‌ഡേറ്റിലൂടെ വാട്സാപ്പ് ഉദ്ദേശിച്ചിരിക്കുന്നത്.
പകുതി ടൈപ്പ് ചെയ്‌ത സന്ദേശങ്ങൾ സംരക്ഷിക്കുന്നതിനും പിന്നീട് അവ കണ്ടെത്തുന്നതിനുമുള്ള സൗകര്യമാണ് വാട്സാപ്പ് ഉപയോക്താക്കൾക്ക് മുന്നിൽ അവതരിപ്പിച്ചിരിക്കുന്നത്. ഒരു ചാറ്റിൽ ഒരിക്കൽ ടൈപ്പ് ചെയ്‌ത് പകുതിയാക്കിയ സന്ദേശം പിന്നീട് ഒരുവസരത്തിൽ പൂർത്തിയാക്കാൻ പുതിയ അപ്‌ഡേറ്റ് വഴി ഉപയോക്താവിന് സാധിക്കും. അതും വളരെ എളുപ്പത്തിൽ പൂർണമല്ലാത്ത സന്ദേശം ഡ്രാഫ്റ്റ് എന്ന ലേബലിൽ ചാറ്റ് ലിസ്റ്റിന്റെ മുകൾ ഭാഗത്ത് ഇനി മുതൽ കാണാനാവും. അപൂർണമായ സന്ദേശമാണെന്ന് പെട്ടെന്ന് തിരിച്ചറിയാൻ ഇതിലൂടെ സാധിക്കും.
ഈ മെസേജ് ഡ്രാഫ്റ്റ് സംവിധാനം ഇപ്പോൾ ആഗോളതലത്തിൽ ലഭ്യമാക്കിയിട്ടുണ്ട്. എല്ലാ ആൻഡ്രോയ്‌ഡ് ഐഒഎസ് ഉപയോക്താക്കൾക്കും ഒരുപോലെ ഈ അപ്‌ഡേറ്റ് ഇപ്പോൾ ഉപയോഗിച്ചുതുടങ്ങാം. ഇതിനായി സ്വന്തം വാട്സാപ്പ് അപ്‌ഡേറ്റ് ചെയ്‌താൽ മാത്രം മതി. പ്രവർത്തന ക്ഷമത മെച്ചപ്പെടുത്തുന്നതിനും ഉപയോക്താക്കളുടെ സമയം ലാഭിക്കുന്നതിനും അവരുടെ അനുഭവം കാര്യക്ഷമമാക്കുന്നതിനുമുള്ള നിരന്തരമായ ശ്രമങ്ങളുടെ ഭാഗമായാണ് ഈ അപ്‌ഡേറ്റ് എന്ന് വാട്സാപ്പ് വ്യക്തമാക്കി.
പൂർത്തിയാകാത്ത സന്ദേശങ്ങൾ എളുപ്പത്തിൽ കണ്ടെത്താവുന്ന രീതിയിൽ ക്രോഡീകരിക്കുന്നതിലൂടെ ദൈനംദിന ആശയവിനിമയത്തിനുള്ള കൂടുതൽ സൗകര്യപ്രദമായ ഉപകരണമായി വാട്‌സാപ്പിനെ മാറ്റാനാണ് കമ്പനി ഉദ്ദേശിക്കുന്നത്.