മലയാളികൾ ഏറെ ആസ്വദിക്കുന്ന കറികളിൽ ഒന്നാണ് സാമ്പാർ. ഇഡ്ഡലിയും സാമ്പാറും ചമ്മന്തിയും ആയിരിക്കും മിക്കവരുടെയും പ്രിയപ്പെട്ട പ്രഭാതഭക്ഷണം. വെെവിധ്യങ്ങളായ രുചിക്കൂട്ടുകളുടെ കലവറയാണ് സാമ്പാർ. മാത്രമല്ല, പച്ചക്കറികൾ ധാരാളം ഉപയോഗിക്കുന്നതിനാൽ ആരോഗ്യത്തിന് വളരെ നല്ലതും. പല നാടുകളിലും പല രീതിയിലാണ് സാമ്പാർ തയ്യാറാക്കുന്നത്. എന്നാൽ രുചിയുടെ കാര്യത്തിൽ ഒരു പടി മുന്നിൽ നിൽക്കുന്നത് മലയാളികളുടെ സാമ്പാർ തന്നെയായിരിക്കും. സാമ്പാർ നല്ല രുചിയോടെ ഉണ്ടാക്കാനും കേടാകാതെ സൂക്ഷിക്കാനും ഈ പൊടികൈകൾ പരീക്ഷിക്കാം.

• സാമ്പാറുണ്ടാക്കാൻ അനുയോജ്യമായത് തുവരപ്പരിപ്പാണ്.
• ചെറുപയർ പരിപ്പും ഉപയോഗിക്കാറുണ്ട്
• ചെറുപയർ പരിപ്പ് വറുത്ത്,​ പച്ചപ്പ്‌ മറിയതിന് ശേഷം ഉപയോഗിക്കാം
• പരിപ്പ് കുക്കറിൽ വേവിക്കുന്നതാണ് നല്ലത്.
• 50 ഗ്രാം പരിപ്പ് ഒരു ലിറ്റർ വെള്ളത്തിൽ വേവിക്കണം [ഒരു കപ്പ് പരിപ്പിന് മൂന്ന് കപ്പ് വെള്ളം ]
• പരിപ്പിന്റെ കൂടെ ഒരു നുള്ള് ഉലുവ ഇട്ടാൽ സാമ്പാർ പെട്ടെന്ന് കേടാകില്ല.
• പരിപ്പ് വേവിക്കുമ്പോൾ ഒരു സ്പൂൺ നല്ലെണ്ണയോ നെയ്യോ ചേർത്താൽ പരിപ്പ് നന്നായി വേകാനും നല്ല മണം ലഭിക്കാനും പരിപ്പ് പതഞ്ഞുപൊങ്ങുന്നത് തടയാനും സഹായിക്കും.
• എണ്ണ ചൂടാക്കി ഒരു നുള്ള് ഉലുവ മൂപ്പിച്ച് പച്ചക്കറികൾ വഴറ്റിയശേഷം വേവിച്ചാൽ കൂടുതൽ മണം കിട്ടും.
• പരിപ്പിന്റെ കൂടെ ഉള്ളി, പച്ചമുളക്, തക്കാളി,​ കായം, കറിവേപ്പില,​ അമരയ്ക്ക, കിഴങ്ങ് എന്നിവ വേവിക്കാം.
• തക്കാളിയും വെണ്ടയ്ക്കയും വഴറ്റി ചേർക്കുന്നതാണ് കൂടുതൽ നല്ലത്.
• സാമ്പാറിന് ഇരുമ്പൻ പുളിയാണ് ഉത്തമം.
• സാമ്പാർ പൊടി അല്പം വെള്ളത്തിൽ കലക്കി ഉപയോഗിക്കുക.
• സാമ്പാർ പൊടി വീട്ടിൽ ഉണ്ടാക്കുമ്പോൾ അല്പം പച്ചരി കൂടി ചേർത്താൽ സാമ്പാറിന് കൊഴുപ്പ് കൂടും.
• സ്വാദ് കൂട്ടാൻ കുറച്ചു ശർക്കര ചേർക്കുന്നതും നല്ലതാണ്.
• മല്ലിയിലയും കറിവേപ്പിലയും കൈ കൊണ്ട് ഞരടി ചേർത്താൽ മണം കൂടും.
• കടുക് പൊട്ടിയ ശേഷം മാത്രമേ വറ്റൽമുളകും കറിവേപ്പിലയും അരിഞ്ഞിടാവൂ.