വാഷിംഗ്ടൺ : യു.എസിൽ ആശങ്കയായി വീണ്ടും ഇ.കോളി ബാക്ടീരിയ വ്യാപനം. കാലിഫോർണിയയിൽ ഒരാൾ മരിച്ചു. കാലിഫോർണിയ ആസ്ഥാനമായുള്ള ഗ്രിംവേ ഫാംസിന്റെ പായ്ക്ക് ചെയ്ത ഓർഗാനിക് കാരറ്റിൽ നിന്നാണ് അണുബാധ പടർന്നതെന്ന് യു.എസ് സെന്റേഴ്സ് ഫോർ ഡിസീസ് കൺട്രോൾ ആൻഡ് പ്രിവെൻഷൻ (സി.ഡി.സി)​ അറിയിച്ചു.

18 സംസ്ഥാനങ്ങളിലായി 39 കേസുകൾ കണ്ടെത്തി. സെപ്തംബർ 6 - ഒക്ടോബർ 28 കാലയളവിലാണ് ഇവർക്ക് അണുബാധ സ്ഥിരീകരിച്ചത്. ബാക്ടീരിയ സാന്നിദ്ധ്യമുള്ള കാരറ്റുകൾ ഷോപ്പുകളിൽ നിന്ന് പിൻവലിച്ചു.

കഴിഞ്ഞ മാസം ഫാസ്റ്റ് ഫുഡ് ഭീമനായ മക്‌ഡൊണാൾഡ്സിന്റെ ബർഗർ കഴിച്ച നൂറിലേറെ പേർക്ക് ഭക്ഷ്യവിഷബാധയേറ്റിരുന്നു. ബർഗറിലെ ഉള്ളിയിലാണ് ഇ.കോളി ബാക്ടീരിയ സാന്നിദ്ധ്യം കണ്ടെത്തിയത്.