'നിങ്ങളുടെ ശ്വാസകോശത്തിന്റെ പ്രവർത്തനം അറിയുക' എന്നതാണ് ഈ വർഷത്തെ ലോക സി ഒ പി ഡി ദിനത്തിന്റെ വിഷയം. ശ്വാസകോശത്തിന്റെ പ്രവർത്തനം മനസിലാക്കേണ്ടതിന്റെ പ്രാധാന്യം എടുത്തുകാട്ടാനാണ് ഈ ദിനം ആചരിക്കുന്നത്. സ്‌പൈറോമെട്രി ടെസ്റ്റ് ഉപയോഗിച്ച് ശ്വാസനാളത്തിന്റെ തടസവും മറ്റു പ്രശ്നങ്ങളും കണ്ടെത്താൻ സാധിക്കുന്നു.

ശ്വാസകോശ പ്രവർത്തന പരിശോധന അല്ലെങ്കിൽ സ്‌പൈറോമെട്രിയിലൂടെ ശ്വാസകോശാരോഗ്യം മാത്രമല്ല, നമ്മുടെ മൊത്തത്തിലുള്ള ആരോഗ്യത്തെ പറ്റിയും അറിയാൻ കഴിയുന്നു. സിഒപിഡി ഉൾപ്പെടെയുള്ള മറ്റു ശ്വാസകോശ രോഗങ്ങളുടെ നേരത്തെയുള്ള രോഗനിർണ്ണയത്തിനും ചികിത്സയ്ക്കും കൃത്യമായ ഇടവേളകളിലുള്ള സ്‌പൈറോമെട്രി പരിശോധന വഴിയൊരുക്കുന്നു. പുകയിലയുടെ ഉപയോഗം, വായു മലിനീകരണം, ശ്വാസകോശ സംബന്ധമായ അണുബാധകൾ എന്നിവ ഭാവിയിൽ ശ്വാസകോശത്തിന്റെ ആരോഗ്യത്തെ പ്രതികൂലമായി ബാധിക്കുന്നു. ഈ ശീലങ്ങൾ പിന്നീട് ജീവിതത്തിൽ വിട്ടുമാറാത്ത ശ്വാസകോശരോഗങ്ങൾ ഉണ്ടാകാനുള്ള സാദ്ധ്യത വർദ്ധിപ്പിക്കുകയും ചെയ്യുന്നു.

എന്താണ് സി ഒ പി ഡി?

COPD - Chronic Obstructive Pulmonary Disease, ശ്വാസനാളങ്ങൾ അടഞ്ഞു പോവുകയും ശ്വാസകോശങ്ങളുടെ പ്രവർത്തനം വളരെ മന്ദഗതിയിലാകുകയും ചെയ്യുന്ന അവസ്ഥയാണ്. സി ഒ പി ഡിയുടെ പ്രധാന ലക്ഷണം ആയാസമുള്ള ജോലികൾ ചെയ്യുമ്പോൾ അനുഭവപ്പെടുന്ന കിതപ്പും ശ്വാസതടസവുമാണ്. സി ഒ പി ഡി പുരോഗമിക്കുമ്പോൾ, പതിവായി ചുമ, ശ്വാസതടസ്സം, എന്നിവ അനുഭവപ്പെടാം. ഇത് തീവ്രമാകുമ്പോൾ, ശരീരത്തിൽ ഓക്സിജന്റെ അളവ് കുറയുകയും ക്രമേണ respiratory failure ആകാനും സാദ്ധ്യതയുണ്ട്.

സി ഒ പി ഡിയുടെ അപകട ഘടകങ്ങൾ
പുകവലി
വായു മലിനീകരണം
ജനിതകം
കുട്ടിക്കാലത്ത് ആവർത്തിച്ചുള്ള ശ്വാസകോശ സംബന്ധമായ അണുബാധകൾ ഉണ്ടാവുക
പ്രായം

സ്ഥായിയായി ശ്വാസനാളങ്ങളെ ബാധിക്കുന്ന ഈ രോഗം ലോകാരോഗ്യ സംഘടനയുടെ കണക്കനുസരിച്ച് മരണകാരണമായ രോഗങ്ങളിൽ മൂന്നാമത്തെ സ്ഥാനത്താണ്.

90% സി ഒ പി ഡി മരണങ്ങളും അവികസിത വികസ്വര രാജ്യങ്ങളുലെ 70 വയസിന് താഴെയുള്ളവരിലാണ് സംഭവിക്കുന്നത്. ലോകമെമ്പാടുമുള്ള അനാരോഗ്യത്തിന്റെ ഏഴാമത്തെ പ്രധാന കാരണമാണ് സി ഒ പി ഡി. വികസിത രാജ്യങ്ങളിൽ 70% സിഒപിഡിയുടെ കാരണം പുകവലിയാണ്. അതേസമയം അവികസിത വികസ്വര രാജ്യങ്ങളിൽ, 30 - 40% സിഒപിഡി കേസുകളാണ് പുകവലി മൂലം ഉണ്ടാകുന്നത്, അന്തരീക്ഷ മലിനീകരണവും പുകയടുപ്പിലെ പുകയുമാണ് മറ്റു കാരണങ്ങൾ.

പ്രതിരോധ മാർഗങ്ങൾ എന്തെല്ലാം?

സിഒപിഡിയെക്കുറിച്ചുള്ള അറിവ് രോഗ പ്രതിരോധത്തിന് വഴിയൊരുക്കുന്നു. സിഒപിഡിയെ ചെറുക്കുന്നതിൽ അപകടസാദ്ധ്യതാ ഘടകങ്ങളുമായി സമ്പർക്കം പുലർത്തുന്നത് തീർത്തും ഒഴിവാക്കേണ്ടതാണ്.

നിങ്ങളുടെ ശ്വാസകോശത്തെ പരിപാലിക്കാൻ സ്വീകരിക്കേണ്ട മാർഗങ്ങൾ

പുകവലി ഉപേക്ഷിക്കുക, ആതോടൊപ്പം മറ്റൊരാൾ പുകവലിക്കുമ്പോൾ ആ പുക ശ്വസിക്കാതിരിക്കുക.
വീട്ടിലെ പുകയടുപ്പിൽ നിന്നും മാലിന്യം കത്തിക്കുമ്പോഴും ഉള്ള പുക ശ്വസിക്കുന്നത് ഒഴിവാക്കുക.
വ്യായാമം ചെയ്യുന്നത് ശീലമാക്കുക, അതുവഴി നിങ്ങളുടെ ശ്വാസകോശ പ്രവർത്തനവും പൊതുവായ ആരോഗ്യവും മെച്ചപ്പെടുത്താനാകും.
പ്രതിരോധശേഷി വർദ്ധിപ്പിക്കുന്നതാനായി സമികൃതാഹാരം ശീലമാക്കുക.
ആസ്ത്മ, പ്രമേഹം, ഹൈപ്പർടെൻഷൻ തുടങ്ങിയ അസുഖങ്ങൾ നിയന്ത്രണ വിധേയമാക്കുക.
സി ഒ പി ഡിയെക്കുറിച്ച് അവബോധരാവുക

ചുരുക്കിപ്പറഞ്ഞാൽ, ലോക സി ഒ പി ഡി ദിനം ഒരാളുടെ ശ്വാസകോശത്തിന്റെ പ്രവർത്തനം മനസിലാക്കേണ്ടതിന്റെ പ്രാധാന്യത്തിന്റെ ഓർമ്മപ്പെടുത്തലാണ്. 'നിങ്ങളുടെ ശ്വാസകോശത്തിന്റെ പ്രവർത്തനം അറിയുക' എന്ന തീം നമ്മുടെ ശ്വാസകോശാരോഗ്യത്തിന് മുൻഗണന നൽകാനും മൊത്തത്തിലുള്ള ആരോഗ്യം സംരക്ഷിക്കുന്നതിനു വേണ്ട പ്രവർത്തനങ്ങളിൽ ഏർപ്പെടാനും നമ്മെ പ്രചോദിപ്പിക്കുന്നു.

Dr. Sofia Salim Malik
Senior Consultant Pulmonologist,
Allergy, Immunology & Sleep Consultant
SUT Hospital, Patom