ബാലരാമപുരം: ബാലരാമപുരം വിശുദ്ധ സെബസ്ത്യാനോസ് ഫെറോന തീർത്ഥാടന ദേവാലയ തിരുനാൾ ജനുവരി 17ന് കൊടിയേറി 26ന് ആഘോഷമായ പൊന്തിഫിക്കൽ ദിവ്യബലിയോടെ സമാപിക്കും.ബാലരാമപുരം സെന്റ് സെബസ്ത്യാനോസ് ഓഡിറ്റോറിയത്തിൽ ചേർന്ന ആലോചനായോഗം എം.വിൻസെന്റ് എം.എൽ.എയുടെ അദ്ധ്യക്ഷതയിൽ നടന്നു.ഇടവക വികാരി ഫാദർ വിക്ടർ എവരിസ്റ്റസ് ആമുഖപ്രസംഗം നടത്തി.ആരോഗ്യവകുപ്പ്,​പൊലീസ്,​കെ.എസ്.ആർ.ടി.സി,​റവന്യൂ,​ഫയർഫോഴ്സ്,​പി.ഡബ്ളിയു.ഡി,​വാട്ടർ അതോറിട്ടി,​പഞ്ചായത്ത് തുടങ്ങിയ വകുപ്പുതല ഉദ്യോഗസ്ഥർ പങ്കെടുത്തു. തിരുനാൾ മുന്നൊരുക്കങ്ങൾ ഭംഗിയായി പൂർത്തീകരിക്കണമെന്നും വിവിധ വകുപ്പുകൾ സംയുക്തമായി തിരുനാൾ ആഘോഷം വിജയിപ്പിക്കണമെന്നും വിൻസെന്റ് എം.എൽ.എ പറഞ്ഞു. പഞ്ചായത്ത് പ്രസിഡന്റ് വി.മോഹനൻ,​മെമ്പർമാരായ ഫ്രെഡറിക് ഷാജി,​എൽ.ജോസ്,​ഇടവക വൈസ് പ്രസിഡന്റ് ബാസാനിയോ,​ഇടവക കമ്മിറ്റിയംഗങ്ങൾ എന്നിവർ പങ്കെടുത്തു.

ജനുവരി 17ന് വൈകിട്ട് 5ന് ഇടവക വികാരി വിക്ടർ എവരിസ്റ്റസ് തിരുനാൾ കൊടിയേറ്റ് നിർവഹിക്കും.തുടർന്ന് നടക്കുന്ന പൊന്തിഫിക്കൽ ദിവ്യബലിക്ക് തിരുവനന്തപുരം ലത്തീൻ അതിരൂപത മെത്രോപ്പൊലീത്ത ഡോ.തോമസ്.ജെ നെറ്റോ നേതൃത്വം നൽകും.25,​26 തീയതികളിൽ വിശുദ്ധന്റെ തിരുസ്വരൂപം വഹിച്ചുകൊണ്ടുള്ള ആഘോഷമായ ചപ്രപ്രദക്ഷിണം നടക്കും.26ന് നടക്കുന്ന ആഘോഷമായ പൊന്തിഫിക്കൽ ദിവ്യബലിയിൽ നെയ്യാറ്റിൻകര രൂപതാ മെത്രാൻ ഡോ.വിൻസെന്റ് സാമുവേൽ മുഖ്യകാർമ്മികത്വം വഹിക്കും.17ന് സാംസ്കാരിക സമ്മേളനവും 20ന് സർവമതസമ്മേളനവും നടക്കും.