ഉപഭോക്താക്കൾക്ക് വളരെ കാലമായി കാത്തിരുന്ന പുതിയ അപ്‌ഡേറ്റുമായി വാട്സാപ്പ്. പല സ്ഥലങ്ങളിലും നിൽക്കുപ്പോൾ വോയിസ് മെസേജ് എടുത്ത് കേൾക്കുന്നത് വളരെ ബുദ്ധിമുട്ട് പിടിച്ച പണിയാണ്. ഇത് മനസിലാക്കിയാണ് പുതിയ അപ്‌ഡേറ്റ് മെറ്റ അവതരിപ്പിക്കുന്നത്.
വാട്സാപ്പിൽ വരുന്ന വോയിസ് മെസേജുകൾ വായിക്കാനാകുന്ന രൂപത്തിലാക്കി മാറ്റുന്നതാണ് പുതിയ ഫീച്ചർ. വാട്സാപ്പ് വോയിസ് മെസേജ് ട്രാൻസ്ക്രിപ്റ്റ് എന്നാണ് ഇതിന് അറിയപ്പെടുന്നത്. വാട്സാപ്പിൽ ഉടൻ ഈ സംവിധാനം വരുമെന്നാണ് റിപ്പോർട്ട്. വാട്സാപ്പിൽ വരുന്ന വോയ്സ് മെസേജ് ഈ സംവിധാനത്തിലൂടെ ഓട്ടോമാറ്റിക്കായി ടെക്സ്റ്റായി മാറുന്നു.
ഇതോടെ മെസേജ് കേൾക്കാതെ തന്നെ അതിൽ എന്താണെന്ന് അറിയുകയും അതിന് മറുപടി നൽകുകയും ചെയ്യാം. വോയിസ് മെസേജിന് തൊട്ടുതാഴെ തന്നെയായിരിക്കും വോയിസ് മെസേജ് ട്രാൻസ്ക്രിപ്റ്റ് വായിക്കാനായി പ്രത്യക്ഷപ്പെടുക. ഈ ഫീച്ചർ തികച്ചു സുരക്ഷിതമാണെന്നും വാട്സാപ്പ് അധികൃതർ അവകാശപ്പെടുന്നു.
വോയിസ് മെസേജ് ട്രാൻസ്ക്രിപ്റ്റ് സംഭവിക്കുന്നത് ഡിവെെസിനുള്ളിൽ വച്ചാണെന്നും ഇതിന്റെ ഉള്ളടക്കം മറ്റാർക്കും മനസിലാക്കാൻ കഴിയില്ലെന്നും മെറ്റ വാദിക്കുന്നു. ആപ്പിലെ സെറ്റിംഗ്സിൽ പ്രവേശിച്ച് ആവശ്യാനുസരണം വോയിസ് മെസേജ് ട്രാൻസ്ക്രിപ്റ്റ് എനേബിൾ ചെയ്യാനും ഡിസേബിൾ ചെയ്യാനും സാധിക്കും. വരും ആഴ്ചകളിൽ എല്ലാ വാട്സാപ്പ് ഉപഭോക്താക്കൾക്കും ഈ ഫീച്ചർ ലഭ്യമാകും.
പകുതി ടൈപ്പ് ചെയ്‌ത സന്ദേശങ്ങൾ സംരക്ഷിക്കുന്നതിനും പിന്നീട് അവ കണ്ടെത്തുന്നതിനുമുള്ള സൗകര്യം അടുത്തിടെ വാട്സാപ്പ് ഉപഭോക്താക്കൾക്ക് മുന്നിൽ അവതരിപ്പിച്ചിരുന്നു. ഒരു ചാറ്റിൽ ഒരിക്കൽ ടൈപ്പ് ചെയ്‌ത് പകുതിയാക്കിയ സന്ദേശം പിന്നീട് ഒരവസരത്തിൽ പൂർത്തിയാക്കാൻ പുതിയ അപ്‌ഡേറ്റ് വഴി ഉപയോക്താവിന് സാധിക്കും. അതും വളരെ എളുപ്പത്തിൽ പൂർണമല്ലാത്ത സന്ദേശം ഡ്രാഫ്റ്റ് എന്ന ലേബലിൽ ചാറ്റ് ലിസ്റ്റിന്റെ മുകൾ ഭാഗത്ത് ഇനി മുതൽ കാണാനാവും. അപൂർണമായ സന്ദേശമാണെന്ന് പെട്ടെന്ന് തിരിച്ചറിയാൻ ഇതിലൂടെ സാധിക്കും.