ശബരിമല: ഹോട്ടലുകളിൽ ഭക്ഷണം കഴിക്കുന്ന തീർത്ഥാടകർക്ക് പരാതിയുണ്ടെങ്കിൽ ഭക്ഷ്യസുരക്ഷാ വകുപ്പിനെ നേരിട്ട് വിളിക്കാമെന്ന് അധികൃതർ. പമ്പ, സന്നിധാനം, നിലയ്ക്കൽ എന്നിവിടങ്ങൾ കേന്ദ്രീകരിച്ച് വിവിധ സ്ക്വാഡുകളെയാണ് വകുപ്പ് രാഗത്തിറക്കിയിരിക്കുന്നത്. മൂന്ന് പേരടങ്ങുന്ന നാലു ടീമുകളാണ് ഓരോ മേഖലയിലുമുള്ളത്. സന്നിധാനം 7593861767, പമ്പ 8592999666 , നിലയ്ക്കൽ 7593861768 എന്നിവയ്ക്ക് പുറമെ ടോൾ ഫ്രീ 18004251125 നമ്പറും സജ്ജീകരിച്ചിട്ടുണ്ട്.

ഒരു മേഖലയിൽ മാത്രം ദിവസേന കുറഞ്ഞത് ഇരുപത് പരിശോധനകൾവരെ ഭക്ഷ്യസുരക്ഷ വകുപ്പ് നടത്തുന്നുണ്ട്. സന്നിധാനത്ത് പ്രവർത്തിക്കുന്ന കടകളിൽ ഭക്ഷണം പാചകം ചെയ്ത് തുറസായ രീതിയിൽ പ്രദശിപ്പിക്കുന്ന പ്രവണതയുണ്ട് . ഈ സ്ഥാപനങ്ങൾക്ക് നോട്ടീസ് നൽകിയിട്ടുണ്ട്.

അതേസമയം, ശുചിത്വപൂർണ തീർത്ഥാടനം സാദ്ധ്യമാക്കാൻ ശബരിമല പാതകളിൽ ഹരിത ചെക്‌പോസ്​റ്റുകൾ ആരംഭിച്ചു. പ്ലാസ്​റ്റിക് ഉൾപ്പെടെ പാഴ്വസ്തുക്കളും അജൈവ വസ്തുക്കളും വഴിയിൽ തള്ളാതെ ഹരിത കർമസേനയ്ക്ക് കൈമാറാനാണ് ഹരിത ചെക്‌പോസ്​റ്റുകൾ ആരംഭിച്ചിരിക്കുന്നത്.ശബരിമല പാതയിൽ 12 സ്ഥലങ്ങളിൽ തീർത്ഥാടനം സമാപിക്കുന്നതു വരെ ഇത്തരം സാധനങ്ങൾ ദിവസവും സംഭരിക്കും.

തദ്ദേശഭരണ വകുപ്പ്, കോട്ടയം ജില്ലാ ശുചിത്വ മിഷൻ എന്നിവയുടെ മേൽനോട്ടത്തിൽ എരുമേലി പഞ്ചായത്തിന്റെ നേതൃത്വത്തിലാണ് ചെക്‌പോസ്​റ്റുകളുടെ പ്രവർത്തനം. ഇതിന് യൂസർ ഫീ ഈടാക്കില്ല.