ബീജിംഗ്: ലോകത്തിലെ ഏ​റ്റവും വലിയ സ്വർണനിക്ഷേപം ചൈനയിൽ കണ്ടെത്തി. സെൻട്രൽ ചൈനയിൽ ഉയർന്ന നിലവാരത്തിലുളള 1000 മെട്രിക് ടൺ (1,100 യുഎസ് ടൺ) സ്വർണ അയിരുകളുടെ നിക്ഷേപമുണ്ടെന്നാണ് റിപ്പോർട്ട് ചെയ്തിരിക്കുന്നത്. ഇത് ഏഴ് ലക്ഷം കോടി രൂപ വിലമതിപ്പുളളതാണെന്നാണ് റിപ്പോർട്ട്. രാജ്യത്തെ വടക്കുകിഴക്കൻ ഭാഗമായ പിംഗ്ജിയാംഗ് കൗണ്ടിയിൽ ഹുനാൻ പ്രവിശ്യയിലെ ജിയോളജിക്കൽ ബ്യൂറോയാണ് നിക്ഷേപം കണ്ടെത്തിയതായി സ്ഥിരീകരിച്ചിരിക്കുന്നത്.

ചൈനീസ് സ്​റ്റേ​റ്റ് മീഡിയ റിപ്പോർട്ട് ചെയ്തനുസരിച്ച് പ്രാഥമിക പരിശോധനയിൽ രണ്ട് കിലോമീ​റ്റർ ആഴത്തിൽ 40 ഗോൾഡ് വെയിനുകൾ കണ്ടെത്തി. 300 മെട്രിക് ടൺ സ്വർണം ഇവിടെ നിന്ന് മാത്രമായി കണ്ടെടുത്തിട്ടുണ്ട്. വിപുലമായ രീതിയിൽ 3ഡി മോഡലിംഗ് കൂടി ഉപയോഗിച്ച് ഖനനം നടത്തുകയാണെങ്കിൽ ഈ മേഖലയിൽ നിന്നും ഇനിയും സ്വർണനിക്ഷേപമുണ്ടെന്ന് ഉറപ്പിക്കാൻ സാധിക്കും. ഇത് ചൈനയുടെ സ്വർണവ്യവസായത്തിൽ പ്രധാന്യമേറിയതാണ്. ഇതിലൂടെ രാജ്യത്തിന്റെ സാമ്പത്തികശേഷിയും ഖനനത്തിന്റെയും നിലവാരവും ഉയർത്താൻ സാധിക്കും.

പ്രദേശത്തെ പല പാറകൾ തുരന്നപ്പോഴും സ്വർണത്തിന്റെ നിക്ഷേപം കണ്ടെത്താൻ സാധിച്ചെന്ന് ഓർ പ്രോസ്‌പെക്ടിംഗ് വിദഗ്ദനായ ചെൻ റൂലിൻ പറഞ്ഞു. 2000 മീ​റ്റർ പരിധിയിലുളള ഒരു ടൺ അയിരിൽ പരമാവധി 138 ഗ്രാം സ്വർണം അടങ്ങിയിട്ടുണ്ടെന്നും അദ്ദേഹം പറഞ്ഞു. 3ഡി ജിയോളജിക്കൽ മോഡലിംഗ് പോലുളള പുതിയ സാങ്കേതികവിദ്യകൾ പ്രയോജനപ്പെടുത്തിയാണ് സ്വർണമേഖലയിൽ ഖനനം നടത്തുന്നതെന്ന് സംഘത്തിന്റെ തലവൻ ലിയു യോംഗ്ജൻ പറഞ്ഞു.

മൈനിംഗ് ടെക്‌നോളജി അനുസരിച്ച് താഴെ പറയുന്നവയാണ് ലോകത്ത് ഇതുവരെ തിരിച്ചറിഞ്ഞിട്ടുളള പ്രധാന പ്രകൃതി ദത്ത സ്വർണഖനന പ്രദേശങ്ങൾ.

1. സൗത്ത് ഡീപ് ഗോൾഡ് മൈൻ - ദക്ഷിണാഫ്രിക്ക
2. ഗ്രാസ്ബർഗ് ഗോൾഡ് മൈൻ - ഇന്തോനേഷ്യ
3. ഒളിമ്പിയഡ ഗോൾഡ് മൈൻ - റഷ്യ
4. ലിഹിർ ഗോൾഡ് മൈൻ - പാപുവ ന്യൂ ഗിനിയ
5. നോർട്ടെ അബിയേർട്ടോ ഗോൾഡ് മൈൻ - ചിലി
6. കാർലിൻ ട്രെൻഡ് ഗോൾഡ് മൈൻ - യുഎസ്എ
7. ബോഡിംഗ്ടൺ ഗോൾഡ് മൈൻ - വെസ്റ്റേൺ ഓസ്‌ട്രേലിയ
8. എംപോനെംഗ് ഗോൾഡ് മൈൻ - ദക്ഷിണാഫ്രിക്ക
9. പ്യൂബ്ലോ വിജോ ഗോൾഡ് മൈൻ - ഡൊമിനിക്കൻ റിപ്പബ്ലിക്
10. കോർട്ടെസ് ഗോൾഡ് മൈൻ - യുഎസ്എ