ലോകത്തെ ഏറ്റവും മികച്ച സ്കോച്ച് വിസ്‌കി നിർമ്മിക്കുന്നത് ഇന്ത്യൻ സിനിമയിലെ ഒരു സൂപ്പർ താരമാണ്. അദ്ദേഹവും മകനും നേതൃത്വം നൽകുന്ന കമ്പനിയുടേതാണ് ലിറ്ററിന് 6300 രൂപ വിലവരുന്ന സിംഗിൾ മാൾട്ട് ഐറ്റം. ഇനി ആരാണ് ആ സുപ്പർ താരമെന്ന് പറയാം. ഇന്ത്യയിൽ സെലിബ്രിറ്റികളിൽ ഏറ്റവും കൂടുതൽ ടാക്സ് അടയ്‌ക്കുന്ന ദി വൺ ആന്റ് ഓൺലി ഷാരൂഖ് ഖാൻ. ഷാരൂഖ്, മകൻ അര്യൻ ഖാൻ, ലേട്ടി ബ്ളാഗോവ, ബണ്ടി സിംഗ് എന്നവരുടെ നേതൃത്വത്തിലുള്ള സ്ളാബ് വെഞ്ച്വേഴ്‌സ് ആണ് 'ഡ്യാവോൾ ഇൻസെപ്‌ഷൻ' എന്ന ബ്രാൻഡിൽ സിംഗിൾ മാൾട്ട് സ്കോച്ച് പുറത്തിറക്കുന്നത്.
അടുത്തിടെ നടന്ന ന്യൂയോർക്ക് വേൾഡ് സ്പിരിറ്റ്‌സ് കോംപറ്റീഷനിൽ (എൻ.വൈ.ഡബ്ല്യു.എസ്.സി) ഡ്യാവോൾ ഇൻസെപ്‌ഷന് ബെസ്‌റ്റ് ഓവറോൾ സ്കോച്ച്, ബെസ്‌റ്റ് ഓഫ് ക്ളാസ് ബ്ളെൻഡഡ് മാൾട്ട് സ്കോച്ച് വിസ്‌കി എന്നീ അവാർഡുകൾ ലഭിച്ചിരുന്നു. ലോകത്തിലെ വിവിധ ഭാഗങ്ങളിൽ നിന്നുള്ള വിദഗ്‌ദ്ധരായ പാനലാണ് വേൾഡ് സ്പിരിറ്റ്‌സ് കോംപറ്റീഷനിൽ ഭാഗമാകുന്നത്. ക്വാളിറ്റി, ക്രാഫ്‌റ്റ്‌സ്‌മാൻ ഷിപ്പ് എന്നിവയാണ് പ്രധാനമായും ഇവർ മാനദണ്ഡമാക്കുന്നത്. സ്പിരിറ്റ് നിർമ്മാണ ലോകത്തെ സംബന്ധിച്ചിടത്തോളം എൻ.വൈ.ഡബ്ല്യു.എസ്.സിയിൽ അവാർഡ് ലഭിക്കുക എന്നത് വളരെ അഭിമാനകരമായ നേട്ടമാണ്.
' ഇൻസെപ്‌ഷൻ' വേരിയന്റ് കൂടാതെ പോളണ്ടിൽ നിന്നുള്ള സിംഗിൾ എസ്‌റ്റേറ്റ് വോഡ്‌ക, സ്കോച്ച് വിസ്‌കി (ബ്ളെൻഡഡ്) വോർട്ടക്‌സ് എന്നിവയും വിപണയിൽ എത്തിക്കുന്നുണ്ട്. ഈ ബ്രാൻഡുകളും നിരവധി അവാർഡുകൾ നേടിയതാണ്.