റാന്നി: പ്ലാച്ചേരി പാലത്തിന്റെ കൈവരികൾ തകർന്നത് അറ്റകുറ്റപ്പണി നടത്തി പൊതുമരാമത്ത് വകുപ്പ്. പ്ലാച്ചേരി എരുമേലി റോഡിലെ പ്ലാച്ചേരി വനം സ്റ്റേഷന് സമീപത്തെ പാലത്തിന്റെ തകർന്ന കൈവരിയാണ് പുനരുദ്ധരിച്ചത്. ദീർഘനാളായി പ്രധാന റോഡിലെ പാലത്തിന്റെ കൈവരി തകർന്നു കിടക്കുകയായിരുന്നു. നിരവധി അപകടങ്ങൾ ഇവിടെ ഉണ്ടായിട്ടും അധികൃതർ തിരിഞ്ഞു നോക്കുന്നില്ലെന്ന പരാതി ഉയർന്നിരുന്നു. പുനലൂർ - മൂവാറ്റുപുഴ സംസ്ഥാന പാതയോടു ചേർന്ന് എരുമേലി റോഡിന്റെ ആരംഭത്തിലാണ് വീതി കുറഞ്ഞ ഈ പാലം. ഉന്നത നിലവാരത്തിൽ നിർമ്മിച്ച പ്ലാച്ചേരിഎരുമേലി റോഡിലെ പാലം കോട്ടയം - പത്തനംതിട്ട ജില്ലാ അതിർത്തിയിലാണ്. ശബരിമല സീസൺ ആരംഭിക്കുന്നതിനു മുൻപ് നടക്കുന്ന അറ്റകുറ്റപ്പണിയിൽ ഈ പാലത്തിന്റെ കൈവരി ഉയരത്തിൽ കെട്ടി സുരക്ഷ ഒരുക്കണമെന്ന ആവശ്യമുയർന്നിട്ടും അവഗണിച്ചതോടെ പരാതി ഉയർന്നിരുന്നു. കഴിഞ്ഞ ശബരിമല സീസൺ സമയത്ത് തീർത്ഥാടകരുടെ വാഹനം നിയന്ത്രണം നഷ്ടമായി പാലത്തിൽ ഇടിച്ചിരുന്നു. അന്ന് കൈവരി ഉള്ളത് കൊണ്ട് വാഹനം തോട്ടിലേക്ക് മറിയാതെ രക്ഷപെട്ടിരുന്നു. കഴിഞ്ഞ സീസൺ സമയത്തു പാലത്തിന്റെ ഇരുവശത്തും മരക്കമ്പുകൾ കുഴിച്ചിട്ട് കയർ വലിച്ചു കെട്ടിയാണ് മുന്നറിയിപ്പ് നൽകിയിരുന്നത്. ശബരിമല സീസൺ ആരംഭിക്കുമ്പോൾ വലിയ തിരക്കുള്ള റോഡാണിത്. എരുമേലിക്ക് പോകുന്ന വാഹങ്ങളും സംസ്ഥാനപാത വഴി വരുന്ന വാഹനങ്ങളും ഈ വഴിയാണ് വരിക. രണ്ടു വലിയ വാഹനങ്ങൾ വന്നാൽ തിരിഞ്ഞു പോകാൻ ബുദ്ധിമുട്ടാണ്.