കോന്നി : കോന്നി കെ.എസ്.ആർ.ടി.സി ഡിപ്പോയുടെ യാർഡ് നിർമ്മാണം ഒരാഴ്ചയ്ക്കുള്ളിൽ പൂർത്തീകരിക്കും. നിർമ്മാണ പുരോഗതി അഡ്വ.കെ.യു. ജനീഷ് കുമാർ എം.എൽ.എ വിലയിരുത്തി. ബസ് സ്റ്റേഷൻ നിർമ്മാണ പൂർത്തീകരണത്തിന് എം.എൽ.എ ഫണ്ടിൽ നിന്ന് 1.16 കോടി അനുവദിച്ചിരുന്നു. നിലവിൽ യാർഡ് നിർമ്മിച്ചതിന്റെ ശേഷിച്ച ഭാഗം ടാർ ചെയ്യുന്നതിനും ഡ്രയിനനേജ് നിർമ്മിക്കുന്നതിനുമായി 76.90 ലക്ഷം രൂപയും യാത്രക്കാർക്ക് അമിനിറ്റി സെന്റർ, പൊലീസ് എയ്ഡ് പോസ്റ്റ്, ശുചിമുറികൾ എന്നിവ നിർമ്മിക്കുന്നതിനായി 39. 86 ലക്ഷം രൂപയുമാണ് അനുവദിച്ചത്.
യാർഡ് നിർമ്മാണം പൊതുമരാമത്ത് നിരത്ത് വിഭാഗവും, അമിനിറ്റി സെന്റർ നിർമ്മാണം എൽ.എസ്. ജി. ഡി യുമാണ് നിർവഹണം നടത്തുന്നത്.അമിനിറ്റി സെന്റർ നിർമ്മാണത്തിന്റെ ഭാഗമായി പൈലിംഗ് നടത്തുന്നതിനുള്ള യന്ത്രങ്ങൾ എത്തിച്ചിട്ടുണ്ട്. ബസ് സ്റ്റാൻഡിലെ നിലവിലുള്ള യാർഡ് നിർമ്മാണത്തിന് എച്ച്.എൽ.എൽ നിർവഹണ ഏജൻസിയായി ഒന്നരക്കോടി രൂപ അനുവദിച്ച് നിർമ്മാണം പൂർത്തീകരിച്ചിരുന്നു. കെട്ടിട നിർമ്മാണ പൂർത്തീകരണത്തിനും

വൈദ്യുതീകരണത്തിനുമായി 50 ലക്ഷം രൂപയും അനുവദിച്ചിരുന്നു. 32 ലക്ഷം രൂപ എം.എൽ.എ ഫണ്ടിൽ നിന്ന് ചെലവഴിച്ച് സ്റ്റാൻഡിൽ ലൈറ്റുകൾ സ്ഥാപിച്ചിരുന്നു.
കെ.എസ്.ആർ.ടി.സി ബസ് സ്റ്റേഷൻ ഡിജിറ്റലൈസ് ചെയ്യുന്നതിന്റെ ഭാഗമായി അനുബന്ധ ഉപകരണങ്ങൾ വാങ്ങാൻ എട്ട് ലക്ഷം രൂപ അനുവദിച്ചിട്ടുണ്ട്.

-------------

" ബന്ധപ്പെട്ട ഏജൻസികളുടെ യോഗം വിളിച്ച് നിർമ്മാണം വേഗത്തിൽ പൂർത്തീകരിക്കാൻ ആവശ്യമായ നിർദ്ദേശം നൽകും"

അഡ്വ.കെ.യു.ജനീഷ് കുമാർ എം എൽ എ

---------------------

ബസ് സ്റ്റേഷൻ നിർമ്മാണ പൂർത്തീകരണത്തിന് അനുവദിച്ചത് 1.16 കോടി