തിരുവല്ല: ജില്ലാ പഞ്ചഗുസ്തി ചാമ്പ്യൻഷിപ്പ് 24ന് രാവിലെ 9മുതൽ കലഞ്ഞൂർ കെ.വി.എം.എസ് ഹാളിൽ നടക്കും. സംസ്ഥാന ആം റെസിലിംഗ് അസോസിയേഷന്റെ നിർദ്ദേശപ്രകാരം സജ്ജീകരിച്ചിരിക്കുന്ന ടേബിളിലാണ് മത്സരങ്ങൾ നടക്കുന്നത്. സബ് ജൂനിയർ, ജൂനിയർ, യൂത്ത്, സീനിയർ, മാസ്റ്റേഴ്സ്, ഫിസിക്കലി ചലഞ്ചഡ് എന്നീ കാറ്റഗറികളിൽ ഇടത്, വലത് കൈ വിഭാഗങ്ങളിൽ പുരുഷ, വനിത മത്സരങ്ങളാണ് നടക്കുക. ഇരുന്നൂറോളം താരങ്ങൾ മത്സരങ്ങളിൽ പങ്കെടുക്കും. കെ.യു.ജനീഷ് കുമാർ എം.എൽ.എ മത്സരം ഉദ്ഘാടനം ചെയ്യും. ജില്ലാപ്രസിഡന്റ് പി.എസ് അരുൺകുമാർ അദ്ധ്യക്ഷത വഹിക്കും. വൈകിട്ട് സമാപന സമ്മേളനം ജില്ലാ സ്പോർട്സ് കൗൺസിൽ പ്രസിഡന്റ് കെ.അനിൽകുമാർ ഉദ്ഘാടനം ചെയ്യും. ജില്ലാ ആം റെസിലിംഗ് അസോസിയേഷനും ജില്ലാസ്പോർട്സ് കൗൺസിലും ചേർന്നാണ് മത്സരങ്ങൾ സംഘടിപ്പിക്കുന്നത്. രാവിലെ 9മുതൽ 11വരെ മത്സരാർത്ഥികളുടെ ശരീരഭാര നിർണയവും രജിസ്ട്രേഷനും നടക്കും. ജില്ലാ മത്സരങ്ങളിൽ വിജയിക്കുന്ന ഫസ്റ്റ്, സെക്കൻഡ്, തേർഡ് എന്നീ മത്സരാർത്ഥികൾ ഡിസംബറിൽ കോഴിക്കോട്ട് നടക്കുന്ന സംസ്ഥാന മത്സരങ്ങളിൽ ജില്ലയെ പ്രതിനിധീകരിച്ച് മത്സരിക്കുമെന്ന് പ്രസിഡന്റ് പി.എസ്.അരുൺ, സെക്രട്ടറി ശ്രീകുമാർ കൊങ്ങരേട്ട്, ട്രഷറാർ എ.ജയേഷ്കുമാർ എന്നിവർ അറിയിച്ചു.