റാന്നി : കുരുമ്പൻമൂഴിക്ക് പിന്നാലെ അരയാഞ്ഞിലിമൺ ഇരുമ്പ് പാലവും യാഥാർത്ഥ്യമാകുന്നു. സംസ്ഥാന പട്ടികവർഗ വകുപ്പിന്റെ 2.7 കോടി രൂപ ചെലവി​ട്ട് നടപ്പാലം നിർമ്മിക്കും. കേരള കൺസ്ട്രക്ഷൻ കോർപ്പറേഷനാണ് നിർമ്മാണ ചുമതല. പമ്പാനദിയിൽ ജലനിരപ്പ് ഉയർന്ന് പെരുനാട് പഞ്ചായത്തിലെ അറയാഞ്ഞിലിമൺ കോസ്‌വേ വെള്ളത്തിനടിയിലായി​ പ്രദേശം ഒറ്റപ്പെടുന്ന സാഹചര്യമായി​രുന്നു. 2018 ലെ പ്രളയത്തിൽ നടപ്പാലം നശിച്ചു പോയതാണ് പ്രതി​സന്ധി​ക്ക് കാരണമായത്. 400 കുടുംബങ്ങളിലെ രണ്ടായിരത്തിൽപരം ആളുകളാണ് പ്രദേശത്ത് താമസിക്കുന്നത്. കോസ് വേ മുങ്ങി​യാൽ അടിയന്തരഘട്ടങ്ങളിൽ ആശുപത്രിയിൽ പോകാനോ ഭക്ഷ്യസാധനങ്ങൾ വാങ്ങാനോ കുട്ടികൾക്ക് സ്കൂളിൽ പോകാനോ കഴിയാത്ത സാഹചര്യമാണുള്ളത്.

ജനങ്ങളുടെ ദുരിതം പ്രമോദ് നാരായൺ എം.എൽ.എ മുൻ പട്ടികവർഗ വകുപ്പ് മന്ത്രി കെ.രാധാകൃഷ്ണന്റെ ശ്രദ്ധയിൽപ്പെടുത്തിയതോടെ മന്ത്രി ഈ സ്ഥലങ്ങൾ സന്ദർശിച്ചിരുന്നു. തുടർന്നാണ് ഫണ്ട് അനുവദിച്ചത്. പാലത്തിനായുള്ള രൂപരേഖയും എസ്റ്റിമേറ്റും നേരത്തെ തയ്യാറാക്കിയിരുന്നു.

പദ്ധതി ഇങ്ങനെ

അരയാഞ്ഞിലിമൺ പാലം:

നീളം : 83 മീറ്റർ

വീതി : 1.30 മീറ്റർ

ചെലവ് : 2.7 കോടി