കൊല്ലം: വനിതാഡോക്ടറുടെ വീട്ടിൽ നിന്ന് സ്വർണം മോഷ്ടിച്ച ജോലിക്കാരി പിടിയിൽ. മൂന്നാംകുറ്രി അറുനൂറ്റിമംഗലം വിജേഷ് മന്ദിരത്തിൽ വാടകയ്ക്ക് താമസിക്കുന്ന ശാരികയാണ് (38) ഈസ്റ്റ് പൊലീസിന്റെ പിടിയിലായത്.

കഴിഞ്ഞ മാസം 24 നാണ് ശാരിക പട്ടത്താനത്തുള്ള ഡോക്ടറുടെ വീട്ടിൽ ജോലിക്കെത്തിയത്. തുടർന്ന് പലപ്പോഴായി, അലമാരയിലും പ്ലാസ്റ്റിക് ക്യാബിനിലുമായി സൂക്ഷിച്ചിരുന്ന രണ്ടു പവന്റെ നവരത്നമോതിരം, ഒരു പവന്റെ വള, മൂന്ന് പവന്റെ തളയും എന്നി​വ മോഷ്ടിക്കുകയായിരുന്നു. മോഷണം നടക്കുന്ന സമയം പ്രായമായ അമ്മ മാത്രമേ വീട്ടിൽ ഉണ്ടായിരുന്നുള്ളു. മോഷ്ടിച്ച സ്വർണാഭരണങ്ങൾ പ്രതി രണ്ടാംകുറ്റിയിലുള്ള ധനകാര്യ സ്ഥാപനത്തിൽ പണയം വച്ചു. കഴിഞ്ഞ ദിവസമാണ് ആഭരണം നഷ്ടപ്പെട്ട വിവരം വീട്ടുകാർ അറിയുന്നത്. തുടർന്ന് പൊലീസിൽ പരാതി നൽകി​. ശാരികയുടെ ഭർത്താവ് ധനേഷ് മണിലാൽ മോഷണം, ഭവന ഭേദനം കേസുകളിൽ സ്ഥിരം പ്രതിയാണെന്ന് പൊലീസ് പറഞ്ഞു . പണയം വച്ച സ്വർണം പൊലീസ് കണ്ടെടുത്തു. ഈസ്റ്റ് പൊലീസ് ഇൻസ്‌പെക്ടർ അനിൽകുമാറിന്റെ നേതൃത്വത്തിൽ എസ്.ഐമാരായ ഷബ്ന, സവിരാജൻ, സി.പി.ഒമാരായ ഷെഫീക്ക്, അനു ആർ.നാഥ് എന്നിവരടങ്ങിയ സംഘം പി​ടി​കൂടി​യ പ്രതിയെ റിമാൻഡ് ചെയ്തു.