പടിഞ്ഞാറെ കല്ലട: കല്ലടയാറിന് കുറുകെ പടിഞ്ഞാറെകല്ലട മൺട്രോതുരുത്ത് പഞ്ചായത്തുകളെ തമ്മിൽ ബന്ധിപ്പിക്കുന്ന കണ്ണങ്കാട്ടുകടവ് പാലത്തിന്റെ നിർമ്മാണവുമായി ബന്ധപ്പെട്ട് ഏറ്റെടുത്ത ഭൂമിയുടെ ഉടമകൾക്കുള്ള നഷ്ടപരിഹാര തുക ഈ മാസം നൽകുമെന്ന് അധികൃതർ അറിയിച്ചു. 4.45 കോടി രൂപയാണ് പുനരധിവാസ പാക്കേജ് ഉൾപ്പെടെ നഷ്ടപരിഹാരമായി ഭൂഉടമകൾക്ക് നൽകുന്നത്. 2024 ജനുവരിയിലാണ് ഈ തുക നിർവഹണ ഏജൻസി ഭൂഉടമകൾക്ക് നൽകുന്നതിലേക്ക് കിഫ്ബി വിഭാഗം തഹസിൽദാർക്ക് കൈമാറിയത്. നേരത്തെ പ്രഖ്യാപിച്ചിരുന്നതിനേക്കാളും രണ്ടുമാസം മുമ്പ് തന്നെ അവാർഡ് തുക പാസാക്കിയതിനാൽ കമ്പോള വിലയിൽ 12 ശതമാനം തുക സർക്കാരിന് ലാഭിക്കാൻ കഴിഞ്ഞു. ഇതുമായി ബന്ധപ്പെട്ട കൊല്ലം എൽ.എ വിഭാഗം ഓഫീസ് ജീവനക്കാരുടെ അശ്രാന്ത പരിശ്രമഫലമായാണ് ഇത്രയും വേഗം നടപടികൾ പൂ‌ർത്തിയാകാൻ കാരണം.

4.45 കോടി രൂപ ഭൂഉടമകൾക്ക്

13 ഭൂ ഉടമകൾ

1.40 ഏക്കർ ഭൂമി

• നഷ്ടപരിഹാര തുക വിതരണം ചെയ്തശേഷം റവന്യൂ വകുപ്പ് ഭൂമി ഏറ്റെടുത്ത് കെ.ആർ.എഫ്.ബിക്ക് കൈമാറും.
• 2025 ജനുവരിയിൽ ടെണ്ടർ നടപടികൾ ആരംഭിക്കും.
• ഇരുകരകളിലുമായി 13 ഭൂ ഉടമകളിൽ നിന്ന് സമാന്തര റോഡിനായി മൺട്രോത്തുരുത്ത്, പടിഞ്ഞാറെ കല്ലട പഞ്ചായത്തുകളിൽ നിന്ന് 1.40 ഏക്കർ ഭൂമിയാണ് ഏറ്റെടുത്തിട്ടുള്ളത്.
• സമാന്തര റോഡ് വീതി 10 മീറ്റ‌ർ നീളം പടിഞ്ഞാറെകല്ലടയിൽ 125 മീ. മൺട്രോതുരുത്തിൽ 590 മീ. 24.21 കോടി രൂപ പാലം നിർമ്മാണത്തിന് സർക്കാർ അനുവദിച്ചിരുന്നു.
• 5 സ്പാനികളിലായി 158 മീറ്റർ നീളത്തിൽ 11 മീറ്റർ വീതിയിലാണ് പാലം നിർമ്മിക്കുന്നത്.
• കായംകുളം ,കൊല്ലം ബൈപ്പാസ് പടിഞ്ഞാറേ കല്ലടയിൽ നിന്നും കൊല്ലത്തേക്ക് 27 കിലോമീറ്ററാണ് നിലവിലെ ദൂരം.
• പെരുമൺ കണ്ണങ്കാട്ട് കടവ് പാലങ്ങളുടെ പണി പൂർത്തീകരിച്ചാൽ വാഹന യാത്രക്കാർക്ക് ഏതാണ്ട് 10 കിലോമീറ്റർ ദൂരം കുറയും.
• കൂടാതെ, സമയവും ഇന്ധനവും ലാഭിക്കാം .കായംകുളം ,കൊല്ലം ബൈപ്പാസായി ഈ റൂട്ട് ഉപയോഗിക്കാം

കഴിഞ്ഞമാസം 30 ന്പാസാക്കിയ അവാർഡ് തുക ഈ മാസം തന്നെ ഭൂഉടമകൾക്ക് വിതരണം ചെയ്യും .ഡിസംബർ മാസത്തിൽ റവന്യൂ വകുപ്പ് ഭൂമി ഏറ്റെടുത്ത ശേഷം കെ. ആർ. എഫ് ബി ക്ക് കൈമാറും. ബി. ദ്വിദീപ് കുമാർ,

തഹസിൽദാർ എൽ എ വിഭാഗം കിഫ്ബി ,കൊല്ലം.