കൊല്ലം: കൊല്ലം പ്രാക്കുളം ഗവ. എൽ.പി സ്കൂളിൽ സ്പി‌‌ക്മാകെ സഹകരണത്തോടെ തോൽപാവക്കൂത്തിന്റെ അവതരണവും സോദാഹരണ പ്രഭാഷണവും നടന്നു. പത്മശ്രീ അവാർഡ് ജേവാത് രാമചന്ദ്ര പുലവരുടെ നേതൃത്വത്തിൽ ആറംഗ സംഘമാണ് അവതരണം നടത്തിയത്. കേരളപ്പിറവി, മലയാള ഭാഷ വാരാഘോഷങ്ങളുടെ ഭാഗമായും കേരള സംസ്കാരത്തെയും കേരള കലാ പരിസരത്തെയും കുട്ടികൾക്ക് പരിചയപ്പെടുത്തുന്നതിന്റെ ഭാഗമായി​ട്ടുമാണ് തോൽപ്പാവക്കൂത്ത് അവതരണം നടന്നത്. രാമചന്ദ്ര പുലവരെ തൃക്കരുവ ഗ്രാമ പഞ്ചായത്ത് പ്രസിഡന്റ് സരസ്വതി രാമചന്ദ്രൻ പൊന്നാട അണിയിച്ച് ആദരിച്ചു. കൊല്ലം ഉപജില്ലാ വിദ്യാഭ്യാസ ഓഫീസർ ആന്റണി പീറ്റർ, വാർഡ് മെമ്പർ ഡാഡു കോടിയിൽ, പി.ടി​.എ പ്രസിഡന്റ് ജാൻ വാരിയോസ്, ഹെഡ്‍മാസ്റ്റർ കണ്ണൻ ഷൺമുഖം, എസ്.ആർ.ജി കൺവീനർ ബിന്ദു, മിനി, തുടങ്ങിയവർ സംസാരിച്ചു.
രണ്ടായിരത്തിലധികം വർഷം പഴക്കമുള്ള കേരളത്തിലെ പരമ്പരാഗത ആചാരാനുഷ്ഠാന കലയാണ് തോൽപ്പാവക്കൂത്ത്. കേരളത്തിൽ പാലക്കാട് ജില്ലയിലാണ് തോൽപ്പാവക്കൂത്തിന് പ്രാധാന്യമുള്ളത്. മൃഗങ്ങളുടെ തോൽ ഉപയോഗിച്ച് നിർമ്മിക്കുന്ന പാവകൾ ഉപയോഗിച്ചാണ് ഈ കലാരൂപം അരങ്ങിൽ അവതരിപ്പിക്കുന്നത്. രാമായണമാണ് പ്രതിപാദ്യ വിഷയം.നിരവധി കൊത്തുപണികളോടെ കഥാപാത്രങ്ങളുടെ നിർമ്മാണം പൂർത്തിയാക്കാൻ ഒരു മാസത്തോളം വേണം. തോൽപ്പാവകൂത്ത് കലയിലെ പ്രമുഖനാണ് രാമചന്ദ്ര പുലവർ. തോൽപ്പാവക്കൂത്തി​ന് നൽകിയ മികച്ച സംഭാവനകൾ കണക്കിലെടുത്ത് 2021ൽ രാമചന്ദ്ര പുലവർക്ക് രാജ്യം പത്മശ്രീ നൽകി ആദരിച്ചു.