ഓച്ചിറ: ദേവസ്വം ബോർഡ് അധീനതയിലുള്ള ഓച്ചിറ മഹാലക്ഷ്മിക്ഷേത്രം ശബരിമല ഇടത്താവളമാക്കുന്നത് പരിഗണനയിലെന്ന് ദേവസ്വം ബോർഡംഗം എ. അജികുമാർ പറഞ്ഞു. ശബരിമലയിലെ തിരക്ക് കുറയ്ക്കാൻ ആര്യങ്കാവ്, കുളത്തൂപ്പുഴ, ചെങ്ങന്നൂർ എന്നി​വി​ടങ്ങളോടൊപ്പം ഓച്ചിറയും ഇടത്താവളമാക്കുന്നത് പരിഗണയിലാണ്. ദേവസ്വം ബോർഡ് രൂപീകരണത്തിന്റെ പ്ലാറ്റിനം ജൂബിലിയോടനുബന്ധിച്ച് ക്ഷേത്രങ്ങളുടെ ഭൗതിക സൗകര്യങ്ങളും പഞ്ചാത്തല സൗകര്യങ്ങളും വിപുലീകരിക്കുന്നതിന്റെ ഭാഗമായി ഓച്ചിറ മഹാലക്ഷ്മിക്ഷേത്രം, ശാസ്താക്ഷേത്രം, ഭജനമഠം എന്നിവിടങ്ങളിൽ 27 ലക്ഷത്തി​ന്റെ നവീകരണ പ്രവർത്തനങ്ങൾ നടക്കുന്നുണ്ട്. വഴിപാടുകളും സംഭാവനകളും സ്വീകരിക്കാൻ ശബരിമല മാതൃകയിൽ മറ്റു ക്ഷേത്രങ്ങളിലും ക്യു.ആർ കോഡ് സംവിധാനം ഏർപ്പെടുത്തും. നിലവിൽ രാത്രി​ എട്ടു വരെയാണ് ഓച്ചിറയിലെ ദേവസ്വം ബോർഡ് ക്ഷേത്രങ്ങളിൽ ദർശനസമയം. വൃശ്ചികോത്സവത്തിനോടനുബന്ധിച്ച് ദർശന സമയം വർദ്ധിപ്പിക്കുന്ന കാര്യം ആലോചി​ക്കും. ഓച്ചിറ മഹാലക്ഷ്മി ക്ഷേത്രത്തോടനുബന്ധിച്ച ഭജന മഠത്തിലെ മുറികളുടെ വാടക കുറച്ച് അവിടെ കെയർടേക്കറെ നിയമിക്കുമെന്നും അദ്ദേഹം പറഞ്ഞു.