എഴുകോൺ : അനശ്വര രക്തസാക്ഷികളുടെ സ്മൃതി കുടീരങ്ങളിൽ നിന്നുള്ള ദീപശിഖ കൊടിമര പതാക ജാഥകൾ പൊരീക്കൽ ഗുഡ് ഷെപ്പേർഡ് ഓഡിറ്റോറിയത്തിലെ സമ്മേള നഗറിൽ സംഗമിച്ചതോടെ സി.പി.എം നെടുവത്തൂർ ഏരിയ സമ്മേളനത്തിന് തുടക്കമായി.

പ്രതിനിധി സമ്മേളനം ഇന്ന് രാവിലെ 10ന് ആർ.ശിവാനന്ദൻ നഗറിൽ കേന്ദ്ര കമ്മിറ്റി അംഗം കെ.എൻ.ബാലഗോപാൽ ഉദ്ഘാടനം ചെയ്യും. വൈകിട്ട് 6ന് കവിയരങ്ങ് നടക്കും. പ്രതിനിധി സമ്മേളനം നാളെയും തുടരും. ഡിസംബർ 1ന് വൈകിട്ട് 5ന് പൊരീക്കൽ വഞ്ചിമുക്കിൽ നിന്ന് റെഡ് വോളണ്ടിയർ പരേഡും ബഹുജന റാലിയും തുടങ്ങും. പൊരീക്കൽ വായനശാല ജംഗ്ഷനിലെ കോടിയേരി ബാലകൃഷ്ണൻ നഗറിൽ നടക്കുന്ന പൊതു സമ്മേളനം കേന്ദ്ര കമ്മിറ്റിയംഗം ടി.എം.തോമസ് ഐസക്ക് ഉദ്ഘാടനം ചെയ്യും.

ആവേശം ഉയർത്തി ജാഥകളുടെ സംഗമം

വിപ്ലവ മുദ്രാവാക്യങ്ങൾ ആവേശത്തോടെ ഉയർന്ന സായാഹ്നത്തിൽ പൊരീക്കലിൽ സംഗമിച്ച ദീപശിഖ, കൊടിമര, പതാക ജാഥകളെ വരവേൽക്കാൻ നിരവധി പ്രവർത്തകരെത്തി.

വെളിയം ലോക്കൽ കമ്മിറ്റി സെക്രട്ടറി എച്ച്.ആർ.പ്രമോദ് പ്രതിനിധി സമ്മേളന നഗറിലേക്ക് നയിച്ച പതാക ജാഥ വെളിയം കായില കൊച്ചുകുട്ടൻ സ്മൃതി മണ്ഡപത്തിൽ സംസ്ഥാന കമ്മിറ്റിയംഗം കെ.രാജഗോപാൽ ഉദ്ഘാടനം ചെയ്തു. കരീപ്ര സൗത്ത് ലോക്കൽ കമ്മിറ്റി സെക്രട്ടറി വി.കെ.ആദർശ് നയിച്ച ദീപശിഖാ റാലി നെടുമൺകാവ് ശ്രീരാജ് സ്മൃതി മണ്ഡപത്തിൽ ജില്ലാ സെക്രട്ടറിയേറ്റ് അംഗം പി.എ.എബ്രഹാമും, പുത്തൂർ ലോക്കൽ കമ്മിറ്റി സെക്രട്ടറി സി. അനിൽകുമാർ നയിച്ച പൊതു സമ്മേളന നഗറിലേക്കുള്ള പതാക ജാഥ പുത്തൂർ കാരിക്കൽ കെ.കെ. ബാബു സ്മൃതി മണ്ഡപത്തിൽ ജില്ലാ കമ്മിറ്റി അംഗം എസ്.ആർ. അരുൺ ബാബുവും ഉദ്ഘാടനം ചെയ്തു. പവിത്രേശ്വരം ലോക്കൽ കമ്മിറ്റി സെക്രട്ടറി കെ. ജയൻ നയിച്ച കൊടിമര ജാഥ കൈതക്കോട് എരുതനങ്ങാട് ബി. ദേവദത്തൻ സ്മൃതി മണ്ഡപത്തിൽ ഏരിയ സെക്രട്ടറി ജെ.രാമാനുജൻ ഉദ്ഘാടനം ചെയ്തു.