കൊല്ലം: പട്ടത്താനത്തെ പാട്ടത്തിൽക്കാവ്- അക്കരത്തെക്കേ മുക്ക് റോഡ്, ടാറിംഗ് കാത്തി​രി​ക്കാൻ തുടങ്ങി​യി​ട്ട് നാളേറെയായി​.

പുനർനിർമ്മാണത്തിന് പണം അനുവദിച്ചതായി റോഡരി​കി​ൽ പലതവണ ഫ്ലക്സ് ബോർഡുകൾ ഉയർന്നെങ്കിലും നാടി​ന്റെ നടുവ് വേദനയ്ക്ക് പരിഹാരമി​ല്ല.

പാട്ടത്തിൽക്കാവിൽ നിന്ന് ആരംഭിച്ച് ശങ്കുംമുഖം, വേലൻവയൽ, കോവിൽക്ഷേത്രത്തിന് മുന്നിലൂടെ അക്കരത്തെക്കേ മുക്കിലെത്തുന്ന റോഡിന് കഷ്ടിച്ച് രണ്ട് കിലോ മീറ്റർ ദൈർഘ്യമേയുള്ളൂ. പക്ഷേ, ഇതിനിടയിൽ നൂറുകണക്കിന് കുഴികളുണ്ട്. ഓടയില്ലാത്തതിനാൽ മഴക്കാലത്ത് റോഡിലാകെ വെള്ളക്കെട്ട് രൂപപ്പെടും. ഇതോടെ കുഴികൾ തിരിച്ചറിയാനാകില്ല. ഈ സമയങ്ങളിൽ റോഡ് അത്ര പരിചയമില്ലാത്ത ഇരുചക്ര വാഹനയാത്രക്കാർ കുഴികളിൽ വീണ പരിക്കേൽക്കുന്നത് പതിവാണ്. കഴിഞ്ഞ ദിവസം റോഡിലെ കുഴിയിൽ വീണ് ബൈക്ക് മറിഞ്ഞ് ദമ്പതികൾക്ക് പരിക്കേറ്റിരുന്നു.

വാഹനങ്ങൾക്ക് പുറമേ, തൊട്ടടത്തുള്ള പട്ടത്താനം ഗവ. എസ്.എൻ.ഡി.പി.എസിലെ വിദ്യാർത്ഥികളും ഈ റോഡിലൂടെയാണ് സഞ്ചരിക്കുന്നത്. വാഹനങ്ങൾ കയറിയിറങ്ങി കുഴികളുടെ ആഴവും വലിപ്പവും ദിനംപ്രതി വർദ്ധിക്കുന്നു. റോഡ് ടാർ ചെയ്യണമെന്ന് പത്ത് വർഷമായി പ്രദേശവാസികൾ ജനപ്രതിനിധികളോട് ആവശ്യപ്പെടുന്നുണ്ട്. കോവിലിന് മുന്നിൽ നിന്ന് അമ്മൻനടയിലേക്കുള്ള റോഡിന്റെ സ്ഥിതിയും സമാനമാണ്. കുഴികൾ കാരണം ഈ ഭാഗത്തേക്ക് ഓട്ടം വിളിച്ചാൽ ഓട്ടോറിക്ഷക്കാർ വരില്ലെന്നും പ്രദേശവാസികൾ പറയുന്നു.

റോഡ് പുനർനിർമ്മിക്കണമെന്ന് വർഷങ്ങളായി ജനപ്രതിനിധികളോട് ആവശ്യപ്പെടുന്നുണ്ട്. റോഡിന്റെ അവസ്ഥ ദിനംപ്രതി മോശമാവുകയാണ്

എച്ച്. ദിലീപ്കുമാർ (എസ്.എൻ.ഡി.പി യോഗം പട്ടത്താനം 450-ാം നമ്പർ ശാഖ മുൻ സെക്രട്ടറി)