വാടാനപ്പിള്ളി: പഞ്ചായത്തിലെ കള്ളക്കടൽ പ്രതിഭാസം രൂക്ഷമായ സാഹചര്യത്തിൽ തീരശോഷണവും നാശനഷ്ടങ്ങളും പരിശോധിക്കാനായി ജില്ലാ കളക്ടർ അർജുൻ പാണ്ഡ്യൻ പഞ്ചായത്തിലെ വിവിധ വാർഡുകളിൽ സന്ദർശനം നടത്തി. പഞ്ചായത്തിലെ കടൽഭിത്തി നിർമ്മാണം, കുടിവെള്ളക്ഷാമം, വൈദ്യുത വിതരണ തടസം എന്നീ വിഷയങ്ങളിൽ സ്വീകരിക്കേണ്ട നടപടികൾ ചർച്ചചെയ്യാനായി കളക്ടറുടെ ചേംബറിൽ യോഗം ചേർന്നു. ഒന്നാം വാർഡിൽ തീരശോഷണത്തിനുള്ള താത്കാലിക പരിഹാരമായി ഭരണാനുമതി ലഭിച്ച 35 ലക്ഷം രൂപയുടെ റബിൾ മൗണ്ട് വാൾ നിർമ്മാണ പ്രവൃത്തി അടുത്തയാഴ്ച തുടങ്ങാൻ ബന്ധപ്പെട്ട ഉദ്യോഗസ്ഥർക്ക് കളക്ടർ നിർദ്ദേശം നൽകി.
18ാം വാർഡിലെ തീരദേശ സംരക്ഷണത്തിനായി 40 ലക്ഷം രൂപയുടെ താത്കാലിക കടൽഭിത്തി നിർമ്മിക്കാൻ പദ്ധതി സമർപ്പിച്ചിട്ടുണ്ടെന്ന് അഡീഷണൽ ഇറിഗേഷൻ വകുപ്പിലെ ഉദ്യോഗസ്ഥർ അറിയിച്ചു. ഇതിന്റെ തുടർനടപടികൾ വേഗത്തിലാക്കും. വാർഡ് 18 ൽ 450 മീറ്റർ നീളമുള്ള കടൽഭിത്തി നിർമ്മിക്കുന്നതിന് 6.31 കോടിയുടെ പ്രൊപ്പോസൽ നൽകിയെന്ന് ഇറിഗേഷൻ വിഭാഗം എക്‌സിക്യൂട്ടീവ് എൻജിനീയർ അറിയിച്ചു.
വാടാനപ്പള്ളി പഞ്ചായത്ത് പ്രസിഡന്റ് ശാന്തി ഭാസി, സബ് കളക്ടർ അഖിൽ വി.മേനോൻ, ഡെപ്യൂട്ടി കളക്ടർ (ഡി.എം) കെ.ശാന്തകുമാരി, അഡീഷണൽ ഇറിഗേഷൻ എക്‌സിക്യുട്ടീവ് എൻജിനീയർ ബിജു പി.വർഗീസ്, പി.അബ്ദുൾ മജീദ്, ഇരിങ്ങാലക്കുട കെ.എസ്.ഇ.ബി ഡെപ്യൂട്ടി ചീഫ് എൻജിനീയർ കെ.സി.ലളിത, ടി.വി.ബിനോയ് പങ്കെടുത്തു.
മറ്റ് യോഗ തീരുമാനങ്ങൾ
1, 17, 18 വാർഡുകൾ തീരദേശം ഹോട്ട്‌സ് സ്‌പോട്ടായി പ്രഖ്യാപിക്കാനായി സർക്കാരിലേക്ക് സമർപ്പിച്ച പ്രൊപ്പോസലിൽ തുടർനടപടികൾ വേഗത്തിലാക്കാൻ നിർദ്ദേശം
പതിനെട്ടാം വാർഡിലെ ഏഴ് കുടുംബങ്ങളുടെ കുടിവെള്ളക്ഷാമം പരിഹരിക്കാനായി പുതിയ പൈപ്പ്‌ലൈൻ
പതിനേഴാം വാർഡിലെ കുടിവെള്ള വിതരണം കാര്യക്ഷമമാക്കാനുള്ള നടപടികൾ വേഗത്തിലാക്കും.
ഈ പ്രദേശങ്ങളിലെ വൈദ്യുതി തടസം പരിഹരിക്കാൻ കെ.എസ്.ഇ.ബി എക്‌സിക്യൂട്ടീവ് എൻജിനീയർക്ക് ചുമതലപ്രവൃത്തികൾ സബ് കളക്ടർ ഏകോപിപ്പിക്കും