കൊടുങ്ങല്ലൂർ : അലഞ്ഞുനടക്കുന്ന നായകൾക്കായി അഭയകേന്ദ്രം ഒരുക്കുന്നതിന് അനുയോജ്യമായ സ്ഥലം കണ്ടെത്താനും കേന്ദ്രം തുടങ്ങാനുമുള്ള നടപടി സ്വീകരിക്കാൻ നഗരസഭാ കൗൺസിൽ യോഗം തീരുമാനിച്ചു. നഗരസഭയ്ക്ക് സ്വന്തമായി പറ്റിയ സ്ഥലം ഇല്ലാത്തതിനാൽ സ്ഥലം വാടകയ്ക്കെടുത്തും കേന്ദ്രം ആരംഭിക്കും.
പുല്ലൂറ്റ് കെ.ടി.എം കോളേജിന്റെ പരിസര പ്രദേശങ്ങളിലുള്ള ഹോം സ്റ്റേ ഉടമസ്ഥരുടെ യോഗം ചെയർപേഴ്‌സന്റെ നേതൃത്വത്തിൽ വിളിച്ചു ചേർക്കും. യോഗത്തിൽ പൊലീസ്, എക്‌സൈസ് ഉദ്യോഗസ്ഥർ, കോളേജ് അധികൃതർ, റസിഡന്റ്സ് അസോസിയേഷൻ പ്രതിനിധികൾ, വിദ്യാർത്ഥി പ്രതിനിധികൾ എന്നിവരെ കൂടി പങ്കെടുപ്പിക്കും. ആ പ്രദേശത്ത് താമസിക്കുന്നവരിൽ നിന്നും ഉയർന്നുവന്ന പരാതികളുടെ അടിസ്ഥാനത്തിലാണ് യോഗം ചേരുന്നത്. കൗൺസിലർമാരായ പി.എൻ.വിനയചന്ദ്രൻ, കെ.നന്ദകുമാർ എന്നിവരാണ് വിഷയം കൗൺസിലിൽ ഉന്നയിച്ചത്. നഗരസഭ അഞ്ചാം വാർഡിൽ വടക്കേനടയിൽ സിവിൽ സ്റ്റേഷന്റെ സമീപത്തുള്ള ബസ് സ്റ്റോപ്പിനോട് ചേർന്ന് വാട്ടർ എ.ടി.എം സ്ഥാപിക്കുന്നതിന്‌ സർക്കാർ ഏജൻസിയായ കെയ്‌കോ സമർപ്പിച്ച 4,96,000 രൂപയുടെ എസ്റ്റിമേറ്റ് കൗൺസിൽ അംഗീകരിച്ചു. നിർമ്മാണം ഉടനെ ആരംഭിക്കുന്നതിന് കത്ത് നൽകാൻ സെക്രട്ടറിയെ ചുമതലപ്പെടുത്തി. ചെയർപേഴ്‌സൺ ടി.കെ.ഗീത അദ്ധ്യക്ഷത വഹിച്ചു. വൈസ് ചെയർമാൻ വി.എസ്.ദിനൽ, കൗൺസിലർമാരായ കെ.ആർ.ജൈത്രൻ, ടി.എസ്.സജീവൻ, വി.എം.ജോണി എന്നിവർ ചർച്ചയിൽ പങ്കെടുത്തു.
കെട്ടിട നികുതിക്കാര്യത്തിൽ ഇളവുകൾ
കെട്ടിട നിർമ്മാണ പെർമിറ്റ് ഫീസ്, അപേക്ഷ ഫീസ്, സ്‌ക്രൂട്ടിനി ഫീസ് എന്നിവയുടെ നിരക്ക് ആഗസ്റ്റ് മുതൽ കുറവ് വരുത്തിയ സാഹചര്യത്തിൽ, നേരത്തെ ഈടാക്കിയ അധിക തുക തിരിച്ചു നൽകും
കൂടാതെ വസ്തു നികുതി പരിഷ്‌കരണം പൂർത്തിയാക്കി ഡിമാൻഡ് നോട്ടീസ് നൽകിയ കാലയളവിന് മുമ്പുള്ള പിഴപ്പലിശ ഒഴിവാക്കും
നികുതി പരിഷ്‌കരണത്തിന്റെ ഭാഗമായി കെട്ടിട ഉടമകൾ അടയ്‌ക്കേണ്ട നികുതി കുടിശ്ശിക ഉടമകൾ ആവശ്യപ്പെടുന്ന പക്ഷം ഗഡുക്കളായി ഒടുക്കാനും അനുമതി