പാവറട്ടി: എളവള്ളി ഒന്നാം വാർഡിൽ തൊഴിലുറപ്പ് തൊഴിലാളികൾക്ക് കടന്നൽ കുത്തേറ്റു. സാരമായി പരിക്കേറ്റ ചിറ്റാടെ രാമചന്ദ്രൻ മകൾ തങ്കമണി (53), ഓവാട്ട് പ്രേമൻ ഭാര്യ തങ്കമണി (60) എന്നിവരെ മെഡിക്കൽ കോളേജ് ആശുപത്രിയിലും ചേന്ദങ്കര ഉണ്ണിക്കൃഷ്ണൻ ഭാര്യ ശർമിളയെ (46) ഒളരി മദർ ആശുപത്രിയിലും പ്രവേശിപ്പിച്ചു. പരിക്കേറ്റ മറ്റ് നാലു പേരെ എളവള്ളി കുടുംബാരോഗ്യ കേന്ദ്രത്തിൽ പ്രാഥമിക ചികിത്സ നൽകി. ബ്രഹ്മകുളം ചിറയത്ത് ജോസ്ഫീനയുടെ പറമ്പിൽ കൃഷിപ്പണി ചെയ്യുമ്പോഴാണ് കുത്തേറ്റത്. ജനപ്രതിനിധികളായ ടി.സി.മോഹനൻ, ശ്രീബിത ഷാജി എന്നിവരുടെ നേതൃത്വത്തിലാണ് ആശുപത്രിയിലെത്തിച്ചത്. പഞ്ചായത്ത് പ്രസിഡന്റ് ജിയോ ഫോക്‌സ്, ദീജ ദേവദാസ് എന്നിവർ പരിക്കേറ്റവരെ സന്ദർശിച്ചു.