കയ്പമംഗലം: കുടിവെള്ള വിതരണ പൈപ്പ് പൊട്ടി കയ്പമംഗലത്ത് വീണ്ടും കുടിവെള്ളം മുടങ്ങി. ദേശീയപാത 66 നിർമ്മാണ പ്രവർത്തനങ്ങൾ നടക്കുന്ന കയ്പമംഗലം പനമ്പിക്കുന്ന് സെന്ററിനടുത്താണ് പൈപ്പ് പൊട്ടിയത്. ജെ.സി.ബി ഉപയോഗിച്ച് മണ്ണ് നീക്കുന്നതിനിടെ ഇന്നലെ രാവിലെയാണ് കയ്പമംഗലം പഞ്ചായത്ത് പരിധിയിലെ വിതരണത്തിനുള്ള സബ് ലൈൻ പൊട്ടിയത്. എടത്തിരുത്തിയിലെ ഏരാക്കൽ റോഡിൽ പ്രധാന പൈപ്പ് പൊട്ടിയതിനാൽ കഴിഞ്ഞ ഒരാഴ്ചയായി മുടങ്ങിയിരുന്ന കുടിവെള്ള വിതരണം കഴിഞ്ഞദിവസമാണ് ഇവിടെ പുനരാരംഭിച്ചത്. ഇതിനിടെയാണ് വീണ്ടും പൈപ്പ് പൊട്ടിയത്.