കല്ലമ്പലം: ഒറ്റൂരിൽ എൽ.ഇ.ഡി ബൾബുകൾ നിർമ്മിച്ച് ഹരിതകർമ്മസേന. ഒറ്റൂർ പഞ്ചായത്തിലെ തെരുവ് വിളക്കുകൾക്ക് ആവശ്യമായ എൽ.ഇ.ഡി ബൾബുകൾ ഇനിമുതൽ ഹരിതകർമ്മസേനാംഗങ്ങൾ നിർമ്മിക്കും. ഒറ്റൂരിലെ ഹരിതകർമ്മസേനയുടെ തൊഴിൽ സംരംഭമായ ഹരിതം എനർജി സെന്ററാണ് തെരുവ് വിളക്കുകളുടെ നിർമ്മാണ ചുമതല ഏറ്റെടുത്തിരിക്കുന്നത്. 26 അംഗങ്ങളുള്ള ഹരിതകർമ്മസേനയ്ക്ക് അധിക വരുമാനമെന്ന നിലയിലാണ് പദ്ധതി തുടങ്ങിയത്. തുരുത്തിക്കര പഞ്ചായത്തിലെ സയൻസ് സെന്ററിന്റെ സാങ്കേതിക സഹായത്തോടെ ആരംഭിച്ച ഹരിതം എനർജി സെന്ററിൽ ബൾബുകളുടെ നിർമ്മാണവും പരിപാലനവും ആരംഭിച്ചു. കേടായ എൽ.ഇ.ഡി ബൾബുകൾ നന്നാക്കി പുനരുപയോഗം നടത്തുന്നതിലൂടെ മാലിന്യ നിർമ്മാർജനത്തിലും ഹരിതകർമ്മസേന മാതൃകയായിരിക്കുകയാണ്. ഒറ്റൂരിനെ സമ്പൂർണ എൽ.ഇ.ഡി ഗ്രാമമാക്കി മാറ്റുക എന്ന ലക്ഷ്യത്തോടെ വീടുകളിൽ വിപുലമായ സർവേയും ഇതിന്റെ ഭാഗമായി ആരംഭിച്ചു. 2024-25 സാമ്പത്തിക വർഷത്തെ തെരുവ് വിളക്കുകൾ വാങ്ങുന്നതിനാവശ്യമായ പദ്ധതി പ്രയോജനപ്പെടുത്തിയാണ് ഹരിതകർമ്മസേന പഞ്ചായത്തിനാവശ്യമായ എൽ.ഇ.ഡി ബൾബുകൾ നിർമ്മിക്കുന്നത്. ഗവ.എൻജിനിയറിംഗ് കോളേജിലെ ഗുണനിലവാര പരിശോധനകൾക്ക് വിധേയമായാണ് പഞ്ചായത്ത് ബൾബുകൾ വാങ്ങുന്നത്. ഒരു വർഷത്തെ ഗാരന്റിയും സേന ഉറപ്പാക്കുന്നു.

പദ്ധതികൾ പലതുണ്ട്

പഞ്ചായത്തിന്റെ യൂണിറ്റ് ആയതിനാൽ തുടർവർഷങ്ങളിലും ചെറിയ തുക മാത്രം മുടക്കി പരിപാലിച്ച് റീയൂസ് ചെയ്യാമെന്നതും അതിലൂടെ പ്രാദേശിക സാമ്പത്തിക വികസനം ശക്തമാക്കാമെന്നതും പദ്ധതിയുടെ പ്രത്യേകതയാണ്. ഒറ്റത്തവണ ഉപയോഗിക്കുന്ന അജൈവ വസ്തുക്കളുടെ ഉപയോഗം പരമാവധി കുറയ്ക്കുക എന്ന ലക്ഷ്യത്തോടെ ഒരു ഇവന്റ് മാനേജ്മെന്റ് ഗ്രൂപ്പിനും സേന രൂപം നൽകിയിട്ടുണ്ട്. കാറ്ററിംഗ് രംഗത്ത് കടക്കാനും സേന ലക്ഷ്യമിടുന്നു. ബയോബിന്നിൽ ആവശ്യമായ ഇനാക്കുലം നിർമ്മാണ യൂണിറ്റാണ് മറ്റൊന്ന്. വെള്ളായണി കാർഷിക കോളേജിൽ നിന്നും ഇനാക്കുലം നിർമ്മാണത്തിലും മണ്ണിര കമ്പോസ്റ്റ് നിർമ്മാണത്തിലും പരിശീലനം നേടിയ ഹരിതകർമ്മ സേന തൊഴിലുറപ്പ് പദ്ധതിയുടെ സാദ്ധ്യത പ്രയോജനപ്പെടുത്തി വർക്ക്ഷെഡ് നിർമ്മിച്ച് കാർഷിക ഉത്പന്നങ്ങളുടെ ഉത്പാദനം കൂട്ടാനും ലക്ഷ്യമിടുന്നു.